បរទេស៖ លោក Jurgen Klopp អ្នកចាត់ការទូទៅរបស់ក្រុម Liverpool បានបញ្ជាក់ថា លោកនឹងមិនសម្លឹងរកការសងសឹកទៅលើក្រុម Real Madrid ចំពោះការរងបរាជ័យក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ កាលពីឆ្នាំ២០១៨ ឡើយ បើទោះបីលោកបានផ្ទុះកំហឹងដាក់ខ្សែការពារ Sergio Ramos ដែលបានធ្វើឲ្យខ្សែប្រយុទ្ធ Mohamed Salah រងរបួស ក្នុងទីក្រុងគៀវក៏ដោយ។
Salah ដែលបានស៊ុតបាល់បញ្ចូលទី៤៤គ្រាប់ក្នុងយុទ្ធនាការជាលើកដំបូងរបស់គេជាមួយនឹង Liverpool ក្នុងរដូវកាលឆ្នាំ២០១៧-២០១៨ បានរងរបួសស្មារ ក្រោយពីត្រូវបានធ្វើឲ្យដួលដោយ Ramos នៅពាក់កណ្តាលតង់ទី១។ Real បានបន្តឈ្នះពានក្របខ័ណ្ឌកំពូលអឺរ៉ុបជាលើកទី៣ជាប់ៗគ្នារបស់ខ្លួន ក្រោយពីការប្រព្រឹត្តកំហុសរបស់អ្នកចាំទី Loris Karius របស់ក្រុម Liverpool និងគ្រាប់បាល់ស៊ុតបញ្ចូលទីយ៉ាងល្អរបស់ Gareth Bale។ ក្រុមទាំង២ នឹងត្រូវជួបគ្នាជាលើកដំបូង បើគិតចាប់តាំងពីការប្រកួតនោះ នៅរាត្រីនេះ សម្រាប់ការប្រកួតជើងទី១នៃក្របខ័ណ្ឌ Champions League វគ្គ៨ក្រុមចុងក្រោយ ក្នុងរដ្ឋធានីអេស្ប៉ាញ។
លោក Klopp បានឲ្យដឹងថា៖ «ខ្ញុំបាននិយាយនៅពេលនោះថា ប្រសិនបើអ្នកសួរខ្ញុំក្នុងសន្និសីទសារព័ត៌មានក្នុងរយៈពេល១សប្តាហ៍ ឬ១ខែក្រោយមក ថា ខ្ញុំនឹងអញ្ជើញ Sergio Ramos ចូលរួមថ្ងៃខួបកំណើតលើកទី៦០របស់ខ្ញុំដែរ ឬទេ? ខ្ញុំនឹងឆ្លើយថា ទេ មិនអញ្ជើញឡើយ។ ខ្ញុំបាននិយាយថា ខ្ញុំមិនពេញចិត្តនឹងទង្វើដែលបានកើតឡើងនៅរាត្រីនោះឡើយ។ នោះគឺជារាត្រីដ៏ចម្លែក ប៉ុន្តែ ហេតុការណ៍នោះមានរយៈពេលជាយូរមកហើយ»៕
ប្រភពព័ត៌មាន៖ Channel News Asia
