បរទេស៖ វីរបុរសរបស់ក្លឹបបិសាចក្រហមលោក Rio Ferdinand បានរិះគន់ការសម្រេចចិត្តរបស់អតីតគ្រូបង្វឹក Man Utd លោក Louis Van Gaal ដែលបានសាងកំហុសក្នុងការលក់កីឡាករ Danny Welbeck, Javier Hernandez និង Rafael da Silva អំឡុងពេលដែលបុរសសញ្ជាតិហូឡង់រូបនេះនៅដឹកនាំក្លឹបក្នុងចន្លោះឆ្នាំ ២០១៤-២០១៦។
លោក Ferdinand បញ្ជាក់ថា ទាំង Hernandez និង Rafael នៅតែមានទម្រង់លេងល្អ ហើយជាប់ជម្រើសដំបូងជានិច្ចកំលុងពេល៦ឆ្នាំជាមួយក្លឹប។ អតីតខ្សែប្រយុទ្ធសញ្ជាតិមិកសិក Hernandez រកបានគ្រាប់បាល់ដល់ទៅ ៥៩គ្រាប់ ក្រោយចំណាយពេលជិត១ទសវត្សសម្រាប់ក្លឹប ខណៈខ្សែការពារកូនភ្លោះ Rafael ក៏ត្រូវបានអតីតខ្សែការពារ Man Utd ជឿជាក់ថារូបគេនឹងអាចនៅតែជាជម្រើសដំបូងសម្រាប់ក្រុម ប្រសិនជារូបគេបន្តមានវត្តមានជាមួយក្លឹបដល់ពេលបច្ចុប្បន្ននេះ។
គួររំលឹកផងដែលថាពេលនោះ Welbeck ត្រូវបានក្លឹបលក់ទៅឱ្យក្រុមគូប្រជែង Arsenal នៅរដូវក្តៅឆ្នាំ ២០១៤ ខណៈដែល Hernandez និង Rafael ទាំងពីរបានចាកចេញពីទឹកដី Old Trafford នៅឆ្នាំបន្ទាប់។ មូលហេតុដែលលោក Van Gaal លក់ Welbeck ពេលនោះគឺដើម្បីទុកកន្លែងសម្រាប់ខ្សែប្រយុទ្ធចំណូលថ្មី Radamel Falcao ប៉ុន្តែវីរបុរសក្រុមជម្រើសកូឡុំប៊ីរូបនេះមិនទទួលបានជោគជ័យជាមួយក្លឹបនោះទេ។ យ៉ាងណាមិញ Welbeck ទើបតែរកគ្រាប់បាល់ប្រឆាំងនិងក្លឹបចាស់កាលពីថ្ងៃអាទិត្យខណៈ Man Utd ផ្តួល Brighton ២ទល់និង១៕
ប្រភពព័ត៍មាន៖ Metro