បរទេស៖ ខ្សែ​បម្រើ​ប្រយុទ្ធ Phil Foden បាន​រក​គ្រាប់​បាល់​ឈ្នះ​​នៅ​នាទី ទី​៩០ ខណៈ​ដែលក្រុម Manchester City បាន​ដណ្តើម​ការ​នាំមុខ​ដ៏ស្តួច​ស្តើង​ក្នុងលទ្ធ​ផល ២-១ ពី​ការ​ប្រកួត​ជើង​ទី​១នៃ​ក្រប​ខ័ណ្ឌ Champions League វគ្គ​៨​ក្រុម​ចុងក្រោយ​របស់​ពួក​គេ ជាមួយនឹងក្រុម Borussia Dortmund កាល​ពីថ្ងៃ​អង្គារ​។

ខ្សែ​បម្រើស្លាប Kevin De Bruyne បាន​រក​គ្រាប់​បាល់​បើកឆាកនៅនាទី ទី​១៩ សម្រាប់ក្រុម​កំពុង​នាំមុខ​លើ​តារាង​ក្រប​ខ័ណ្ឌ Premier League ប៉ុន្តែ ក្រុម Dortmund រក​បាន​គ្រាប់​បាល់​ក្រៅដី​ដ៏សំខាន់​ នៅ​ពេល​ដែល​ខ្សែ​ប្រយុទ្ធ Erling Haaland បាន​បញ្ជូន​បាល់​ទៅ​ឲ្យ​កីឡាករ Marco Reus ដើម្បី​រក​បាន​គ្រាប់បាល់​តាមស្មើ​វិញ​នៅ​រយៈពេល​៦​នាទី​ចុងក្រោយ​​។ Foden បាន​ខ្ជះ​ខ្ជាយ​ឱកាស​ជាច្រើន ដើម្បី​បន្ថែម​ការ​នាំមុខ​សម្រាប់ក្រុម Man City ក្នុងការ​ប្រកួត​តង់​ទី​២ ប៉ុន្តែ បាន​ស្តារ​មុខមាត់​វិញ នៅ​ជិត​បញ្ចប់​ការ​ប្រកួត​ដើម្បី​ជួយ​​ឲ្យ​ក្រុម​របស់​លោក Pep Guardiola មាន​ប្រៀប​ ខណៈ​ដែល​ការ​ប្រកួត​ជើង​ទី​២ នឹង​ប្រព្រឹត្ត​ទៅ​នៅ​អាល្លឺម៉ង់ នា​ថ្ងៃ​ទី​១៤ ខែ​មេសា​។

ស្រប​ពេល​ជា​មួយ​គ្នា​នេះ ខ្សែ​ប្រយុទ្ធ Vinicius Junior បាន​ស៊ុត​បាល់​បញ្ចូល​ទី​២​គ្រាប់ ខណៈ​ដែលក្រុម Real Madrid បាន​ដណ្តើម​យក​ប្រៀប​​ទៅ​លើ​ការ​​ធ្វើ​ឲ្យ​មាន​កំហុស​នៅ​តំបន់​ការ​ពារ​របស់​ក្រុម Liverpool ដើម្បី​ដណ្តើម​យកឈ្នះ ៣-១ និង​ដើម្បី​ខិត​កាន់​តែ​កៀក​ទៅ​វគ្គ​ពាក់​កណ្តាល​ផ្តាច់​ព្រ័ត្រ​៕

ប្រភព​ព័ត៌​មាន៖ Channel News Asia