បរទេស៖ ការចាប់ផ្តើមយ៉ាងល្អឥតខ្ចោះរបស់លោក Thomas Tuchel ក្នុងនាមជាអ្នកចាត់ការទូទៅរបស់ក្រុម Chelsea បានដើរខុសផ្លូវ នៅពេលដែល West Bromwich Albion បានក្លាយជាក្រុមដំបូងគេក្នុងការស៊ុតបាល់បញ្ចូលទី៥គ្រាប់ នៅកីឡដ្ឋាន Stamford Bridge ក្នុងរយៈពេល១០ឆ្នាំ កាលពីថ្ងៃសៅរ៍។
ការរងពិន័យកាតក្រហមរបស់ខ្សែការពារ Thiago Silva នៅដើមតង់ បានក្លាយជាដើមហេតុចម្បងក្នុងពេលពួកគេបានរងបរាជ័យក្នុងលទ្ធផល ៥-២ ខណៈដែលលទ្ធផលនេះ បានបញ្ចប់ការមិនស្គាល់ចាញ់របស់លោក Tuchel ត្រឹម១៤ប្រកួត បើគិតចាប់តាំងពីចូលជំនួសលោកគ្រូបង្វឹក Frank Lampard កាលពីខែមករា។ បច្ចុប្បន្ន គ្រូបង្វឹកសញ្ជាតិអាល្លឺម៉ង់រូបនេះ ត្រូវតែបង្ហាញថា លោកអាចដោះស្រាយបញ្ហាជាលើកដំបូងជាមួយនឹងក្រុមនៅទីក្រុងឡុងដ៍របស់លោក។ លោក Tuchel បានឲ្យដឹងថា៖ «នេះគឺជាការដាស់តឿនមួយ។ យើងនឹងឆ្លើយតបឲ្យបានត្រឹមត្រូវ។ វាពិតជាសំខាន់ណាស់ដែលយើងត្រូវស្តារមុខមាត់វិញ។ ខ្ញុំមិនបានគិតថា វានឹងកើតឡើងឡើយ ប៉ុន្តែ ពេលនេះ យើងត្រូវតែទទួលខុសត្រូវ រួមទាំងខ្ញុំដែរ និងលុបចោលកំហុសនេះ»។
លោកបានបន្ថែមទៀតថា៖ «យើងមិនអាចបាត់បង់ការផ្តោតអារម្មណ៍ ក្រោយពីការប្រកួត១៥ ឬ១៤លើកឡើយ។ យើងមិនអាចបោះបង់ការជឿជាក់ដែលយើងមានលើកីឡាករទាំងនេះឡើយ»។ Chelsea ត្រូវតែស្តារមុខមាត់វិញ ពេលធ្វើដំណើរទៅជួបក្រុម Porto ក្នុងការប្រកួតក្របខ័ណ្ឌ Champions League វគ្គ៨ក្រុមចុងក្រោយ ជើងទី១ នៅទីក្រុង Seville ដោយសារតែការរិតត្បិតជុំវិញការផ្ទុះការឆ្លងវីរុសកូរ៉ូណានៅអង់គ្លេស និងអេស្ប៉ាញ៕
ប្រភពព័ត៌មាន៖ Channel News Asiaលោក Tuchel ជួបការសម្រេចចចិត្តដ៏ឈឺក្បាល ពេល Chelsea ទៅជួប Porto