បរទេស៖ ក្រុម Atletico Madrid បានឡើងទៅឈរលើកំពូលតារាងនៃក្របខ័ណ្ឌ La Liga វិញកាលពីថ្ងៃអាទិត្យ ក្រោយពីការបញ្ចប់ក្នុងលទ្ធផលស្មើ ១-១ ជាមួយនឹងក្រុម Real Betis បានជួយឲ្យពួកគេនាំមុខ១ពិន្ទុលើក្រុម Real Madrid។ បើទោះបីជាខ្សែប្រយុទ្ធ Luis Suarez បានអវត្តមានក៏ដោយ ប៉ុន្តែ Atletico បានរកគ្រាប់បាល់នាំមុខមុន ក្រោយពីលេងបាន៥នាទី ដែលនៅពេលនោះ ខ្សែបម្រើស្លាបអន្តរជាតិបែលហ្ស៊ិក Yannick Carrasco បានស៊ុតបាល់បញ្ចូលទីយ៉ាងងាយស្រួល។
ប៉ុន្តែ ទោះបីជាយ៉ាងណា Betis ដែលកំពុងតែស្ថិតក្នុងចំណាត់ថ្នាក់លេខ៦ នៅលើតារាង និងប្រជែងយកកៅអីក្នុងក្របខ័ណ្ឌអឺរ៉ុបនៅរដូវកាលក្រោយនោះ បានរកគ្រាប់បាល់តាមស្មើវិញក្នុងរយៈពេល១១៥នាទីក្រោយមក។ កីឡាករ Cristian Tello បានស៊ុតបាល់បំប៉ោងសំណាញ់ទី ពីក្នុងប្រអប់គ្រោះថ្នាក់ ក្រោយពីការបញ្ជូនបាល់ពីកីឡាករ Alex Moreno។ កាលពីថ្ងៃសៅរ៍ ក្រុម Real Madrid បានឡើងឈរលេខ១ ក្រោយពីការយកឈ្នះលើក្រុម Barcelona ២-១ ក្នុងជំនួបដែលគេហៅថា Clasico។
លោក Simeone ដែលអវត្តមានកីឡាករឆ្នើមៗដូចជា Luis Suarez, Marcos Llorente, Moussa Dembele និង Geoffrey Kondogbia បានបញ្ជាក់ថា៖ «យើងមានបញ្ហានៅតង់ទី២។ ប៉ុន្តែ ខ្ញុំមានកីឡាករដែលប្រឹងអស់ពីសមត្ថភាព។ យើងស្ថិតក្នុងដំណាក់កាលដែលត្រូវតែរឹងមាំ។ រឹងមាំ គឹជាពាក្យដែលខ្ញុំចង់បាន»៕
ប្រភពព័ត៌មាន៖ Channel News Asia
