បរទេស៖ លោក Thomas Tuchel អ្នកចាត់ការទូទៅរបស់ក្រុម Chelsea បានបញ្ជាក់ថា កីឡាកររបស់លោក «មិនត្រូវបែកអារម្មណ៍» តាមរយៈការរបូតការនាំមុខក្នុងលទ្ធផល ២-០ ពីការប្រកួតជើងទី១ លើក្រុម Porto ក្នុងការប្រកួតក្របខ័ណ្ឌ Champions League វគ្គ៨ក្រុមចុងក្រោយ នៅមុនពេលការប្រកួតជើងទី២ នៅរាត្រីនេះឡើយ។
ក្រុមតោខៀវ Chelsea បានបោះមួយជំហានឆ្ពោះទៅកាន់ការប្រកួតវគ្គ៤ក្រុមចុងក្រោយនៃក្របខ័ណ្ឌកំពូលរបស់អឺរ៉ុប តាមរយៈគ្រាប់បាល់ស៊ុតបញ្ចូលទីយ៉ាងល្អរបស់កីឡាករ Mason Mount និង Ben Chilwell ប៉ុន្តែ លោក Tuchel បានបញ្ជាក់ថា លោកនឹងមិនរៀបចំឲ្យក្រុមរបស់លោកផ្តោតលើការការពារគ្រាប់បាល់នាំមុខរបស់ពួកគេ ក្នុងការប្រកួតនៅក្នុងទីក្រុង Seville ឡើយ។ ការប្រកួតនេះ ត្រូវបានរៀបចំឡើងនៅកីឡដ្ឋាន Sanchez Pizjuan របស់ក្លិប Sevilla ដោយសារតែការរិតត្បិតជុំវិញការឆ្លងវីរុសកូវីដ ១៩ ទៅលើការធ្វើដំណើររវាងប្រទេសព័រទុយហ្គាល់ និងអង់គ្លេស។ លោក Tuchel បានប្រាប់សន្និសីទសារព័ត៌មានកាលពីថ្ងៃចន្ទថា៖ «យើងមិនរៀបចំការប្រកួតឲ្យលេងបែបនេះ ដោយសារតែលទ្ធផលដែលយើងមាន ហើយបន្ទាប់មក ផ្លាសប្តូរការប្រកួតរបស់យើងឡើយ។ វាពិតជាសំខាន់ណាស់ក្នុងការផ្តោតអារម្មណ៍ទាំងស្រុង និងលេងការប្រកួតឲ្យបានល្អបំផុតតាមដែលអាច»។
លោកបានបន្ថែមទៀតថា៖ «Porto កាន់តែងាយស្រួលក្នុងការសម្របខ្លួន ពីព្រោះពួកគេដឹងពីអ្វីដែលពួកគេត្រូវធ្វើ ដើម្បីទៅវគ្គបន្ត។ សម្រាប់យើង ប្រសិនបើយើងចាប់ផ្តើមសម្របខ្លួន យើងអាចនឹងបែកអារម្មណ៍របស់យើង»៕
ប្រភពព័ត៌មាន៖ Channel News Asia