បរទេស៖ ក្រោយផ្តួល Chelsea កាលពីសប្តាហ៏មុនលោក Sam Allardyce បានបន្តបង្ហាញពីជំនឿចិត្តដល់អ្នកគាំទ្របន្ទាប់ពី West Brom ទទួលបានជ័យជំនះ២សប្តាហ៏ជាប់ៗគ្នានៅក្របខណ្ឌ Premier League ជាលើកដំបូងនៅរដូវកាលនេះដោយលត់ក្រុមភ្ញៀវ Southampton ក្នុងលទ្ធផល៣ទល់និង០។
ការប្រកួតសប្តាហ៏ទី៣១កាលពីយប់ថ្ងៃច័ន្ទដើមសប្តាហ៏នេះក្រុមម្ចាស់ផ្ទះមានឪកាសរកគ្រាប់បាល់បើកឆាកប៉ុន្តែត្រូវបានចាត់ទុកជាបាល់Offside។ ព្យាយាមលេងដោយការតាំងចិត្តពោលគឺនៅត្រឹមតែចន្លោះរយៈពេល ៤នាទី(នាទីទី៣២និង៣៥) ក្រុមលោកAlladyce បានរកគ្រាប់បាល់២គ្រាប់ធ្វើបានដោយកីឡាករ Matheus Pereira និង Matt Phillips មុនពេលCallum Robinson រកគ្រាប់បាល់បញ្ចប់ទីលើកទី៣នៅនាទីទី៦៩។ ទោះយ៉ាងណាអតីតអ្នកចាំទីMan.Utd កីឡាករSam Johnstone បានជួយសង្គ្រោះបាល់ពិន័យ ១១ ម៉ែត្រពីកីឡាករ James Ward-Prowseបានយ៉ាងល្អនៅជិតបញ្ចប់ ការប្រកួត ។
ជ័យជំនះនេះគឺនាំអោយWest Brom មានគម្លាត៨ពិន្ទុពីចំនុចសុវត្ថិភាពដើម្បីមានជីវិតលេងនៅក្របខណ្ឌ Premier League បន្តទៀត។ មួយវិញទៀតវាជាការរកគ្រាប់បាល់ជ័យជំនះច្រើនបំផុតសម្រាប់ក្រុមគិតចាប់តាំងពីខែវិច្ឆិកាឆ្នាំ ២០១៦ ៕
ប្រភពព័ត៍មាន៖ BBC