បរទេស៖ Jesse Lingard គួរបន្តលេងនៅ West Ham ប្រសើរជាងចូលរួមជាមួយក្រុមកាំភ្លើងធំ Arsenal នៅរដូវកាលថ្មីនេះ យោង ទស្សនៈលើកឡើងរបស់វីរបុរសនិងជាអតីតខ្សែការពារប្រវត្តិសាស្រ្តក្លឹបលោក Rio Ferdinand បានអះអាងដូច្នេះ។
បច្ចុប្បន្នក្នុងនាមអ្នកវិភាគកីឡាប្រចាំទូរទស្សន៏ Sky Sports អតីតខ្សែការពារក្រុមជម្រើសជាតិអង់គ្លេសបន្តថា៖ «ខ្ញុំមិនជឿ ថាអ្នកគាំទ្រ Arsenal នឹងទទួលយក ហើយផ្តល់អ្វីៗគ្រប់យ៉ាងដើម្បីសាងភាពល្បីល្បាញដល់រូបគេនោះទេ ព្រោះតែ Lingard ធ្លាប់បញ្ចេញកាយវិកាយចំអកអោយក្រុមគូប្រជែងមកពីទីក្រុងឡុងដ៏មួយនេះពីអតីតកាលនោះ។Arsenal បានបង្វែរគោលដៅមកលើLingard ក្រោយពី Martin Odegaard កីឡាករខ្ចីជើងពីក្លឹប Real Madrid កំពុងជួប ប្រទះអនាគតមិនច្បាស់លាស់ទេ នៅឯកីឡាដ្ឋាន Emirates»។ គួរកត់សម្គាល់ថាខ្សែបម្រើជម្រើសជាតិអង់គ្លេស បានបង្ហាញទម្រង់លេងដ៏លេចធ្លោដោយស៊ុតបញ្ចូលទីបាន ៨ គ្រាប់និងបង្កើតឪកាសបញ្ចប់ទី ៣ ដងក្នុងការបង្ហាញខ្លួន ៩ លើកក្រោយចូលរួមក្នុងលក្ខណ្ឌខ្ចីជើងជាមួយ Man Utd។
Lingard ក៏ត្រូវបានក្រុមជម្រើសជាតិកោះហៅបង្ហាញខ្លួនសម្រាប់ព្រឹត្តការណ៏ប្រកួតជម្រុះពានរង្វាន់World Cup ឆ្នាំ២០២២ ផងដែរ។ អ្នកចាត់ការទូទៅក្លឹបញញួរធំលោក David Moyes មានបំណងចង់ផ្ទេរLingard ជាអចិន្រ្តៃយ៏ប៉ុន្តែបណ្តាញសារពត៌មានបានចុះផ្សាយថាថ្មីៗនេះមានក្លឹបយក្សធំៗ ដូចជា Real Madrid, Paris Saint-Germain និង Inter Milan កំពុងចាប់អារម្មណ៍និង យកចិត្តទុកដាក់លើខ្សែបម្រើរូបនេះជាខ្លាំង៕
ប្រភពព័ត៍មាន៖ Metro