បរទេស៖ ក្លឹប Juventus បានជ្រើសរើសបេក្ខភាពគ្រូបង្វឹក២រូប ដែលក្នុងនោះគឺ ១. លោក Luciano Spalletti និងគ្រូបង្វឹកក្រុមជម្រើសជាតិអ៊ីតាលីបច្ចុប្បន្នលោក Roberto Mancini មកជំនួសតំណែងលោក Andrea Pirlo យោងគេហទំព័រ អ៊ីតាលីCalciomercato បានចុះផ្សាយ។
លោកPirlo បច្ចុប្បន្នកំពុងតស៊ូដឹកនាំក្រុមការពារតំណែងជើងឯកអ៊ីតាលីSerieA រដូវកាលដំបូង ស្របពេលបរាជ័យចាញ់ក្រុម Atalanta កាលពីសប្តាហ៍មុនរបស់ពួកគេបានធ្វើឱ្យក្រុមឈរនៅចំណាត់ថ្នាក់លេខបួនក្នុងក្របខ័ណ្ឌ Serie A និងប្រឈម ខកខានមិនបានលេងវគ្គជម្រុះក្របខ័ណ្ឌ Champions League នៅរដូវកាលក្រោយ ។មួយវិញទៀត ការធ្លាក់ចេញពីក្របខណ្ឌ Champion League វគ្គ ១៦ក្រុមក្រោមថ្វីជើងPorto រឹតតែធ្វើអោយតំណែងរបស់គ្រូបង្វឹកសញ្ជាតិអ៊ីតាលីរូបនេះកាន់តែឡើងកំដៅ។ លោក Roberto Mancini គ្រូបង្វឹករូបនេះមានបទពិសោធន៏ធ្លាប់ដឹកនាំក្លឹបធំៗ ក្នុងក្របខ័ណ្ឌ Serie A នាពេលកន្លងមករួមមាន Fiorentina, Lazio និង Inter Milan ។ លោកបានដឹកនាំក្រុម Inter Milan ឱ្យឈ្នះពាន Serie A ចំនួន ៣ លើកជាប់ៗគ្នាចន្លោះឆ្នាំ ២០០៥ និង ២០០៨ ។រូបលោកក៏ធ្លាប់ ដឹកនាំ Man. City ឈ្នះជើងឯក Premier League លើកដំបូងរបស់ពួកគេក្នុងរដូវកាល ២០១១-១២ ក្រោយឈ្នះពានរង្វាន់ FA Cup រដូវកាល២០១០-២០១១ ។
បច្ចុប្បន្នរូបលោកបាន ដឹកនាំក្រុមជម្រើសជាតិអ៊ីតាលីត្រៀមចូលរួមការប្រកួតជើងឯកទ្វីបអឺរ៉ុបឆ្នាំ ២០២១ នារដូវក្តៅនេះផងដែរ។ សម្រាប់អតីតអ្នកចាត់ការក្លឹប AS Roma និង Inter Milan លោក Luciano Spalletti ក៏ជាបេក្ខភាពសម្រាប់តំណែងនេះ ស្របពេល បុរសវ័យ ៦២ ឆ្នាំរូបនេះ គ្មានការងារធ្វើនិងកំពុងទន្ទឹងរង់ចាំឪកាសចូលមកដឹកនាំក្លឹបវិញ ។ លោក Spalletti ក៏ធ្លាប់បាននាំ Roma ឈ្នះ Italian Cup ២ដងផងដែរ៕
ប្រភពព័ត៍មាន៖ Sportskeeda