បរទេស៖ ខ្សែប្រយុទ្ធជើងចាស់ Jamie Vardy បានបញ្ចប់ការមិនអាចរកបានគ្រាប់បាល់ត្រឹមរយៈពេល២ខែ ខណៈដែល Leicester បានផ្តួលក្រុម West Brom ក្នុងលទ្ធផល ៣-០ កាលពីថ្ងៃព្រហស្បតិ៍ ដើម្បីពង្រឹងការប្រជែងរបស់ខ្លួនសម្រាប់ចំណាត់ថ្នាក់កំពូលទាំង៤ និងបង្អាក់ដំណើរការនាំការស្រោចស្រង់របស់ក្រុមភ្ញៀវ។
ក្រុមរបស់លោក Brendan Rodgers បានស្រេកឃ្លានជ័យជម្នះយ៉ាងខ្លាំង ក្រោយពីបានរងបរាជ័យ២ប្រកួតចុងក្រោយរបស់ខ្លួន ប៉ុន្តែ បានបង្ហាញពីទម្រង់លេងនៅតំបន់ប្រយុទ្ធយ៉ាងមុតស្រួច នៅពេលប្រកួតជាមួយនឹងក្រុមកំពុងឡើងទម្រង់លេង West Brom នាកីឡដ្ឋាន King Power។ គ្រាប់បាល់ស៊ុតបញ្ចូលទីនៅតង់ទី១ ពីសំណាក់កីឡាករ Jamie Vardy, Jonny Evans និង Kelechi Iheanacho បានធ្វើឲ្យក្រុម West Brom ជួបការលំបាកក្នុងការវាយបកវិញ ហើយក្រុម Leicester បានការពារយ៉ាងរឹងមាំ ក្នុងការប្រកួតនេះ បន្ទាប់ពីបញ្ចប់តង់ទី១។ ក្រុមឈរលេខ៣ Leicester ដែលការធ្លាក់ចុះទម្រង់លេរបស់ពួកគេកាលពីចុងរដូវកាលមុន បានធ្វើឲ្យពួកគេបាត់បង់កៅអីក្នុងក្របខ័ណ្ឌ Champions League នោះ បច្ចុប្បន្ន នាំមុខ៤ពិន្ទុលើក្រុមលេខ៤ Chelsea និង West Ham ខណៈដែលនៅសល់ការប្រកួត៦លើកទៀតនៅរដូវកាលនេះ។
លោក Rodgers បានប្រាប់ទូរទស្សន៍ BT Sport ថា៖ «Jamie Vardy ធ្វើបានយ៉ាងល្អក្នុងអាជីពរបស់គេ ហើយ Kelechi Iheanacho បច្ចុប្បន្នកំពុងតែបង្ហាញគុណភាពរបស់គេ ដោយគេនៅតែអាធ្វើឲ្យល្អប្រសើរជាងនេះ ខណៈដែលរូបគេនៅតែធ្វើឲ្យមានកំហុសជាច្រើន ប៉ុន្តែ គេកំពុងតែកែកំហុសទាំងនោះ»៕
ប្រភពព័ត៌មាន៖ Channel News Asia
