បរទេស៖ លោក Jose Mourinho និងជំនួយការរបស់លោកទាំងអស់បានច្រានចោលកញ្ចប់ទឹកប្រាក់សំណង ៨ លានផោនពី សំណាក់ក្លឹប Tottenham Hotspur បន្ទាប់ពីក្លឹបបញ្ចប់តំណែងរូបលោកជាគ្រូបង្គោលឈុតធំកាលពីថ្ងៃច័ន្ទដើមសប្តាហ៏កន្លងទៅ។
ការបណ្តេញអ្នកចាត់ការសញ្ជាតិព័រទុយហ្គាល់រូបនេះធ្វើឡើងបន្ទាប់ពីក្លឹបឈ្នះតែ១ប្រកួតក្នុងចំណោម ៦ ចុងក្រោយមុនពេលលោក Ryan Mason ដឹកនាំរកឃើញជ័យជំនះ លើកដំបូងក្នុងនាមគ្រូបង្វឹកបណ្តោះអាសន្នពេលប្រកួតជាមួយ Southampton កាលពីថ្ងៃពុធ។ ប្រធានក្លឹប Tottenham លោក Daniel Levy បានផ្តល់ជូននូវសំណងជាកញ្ចប់ទឹកប្រាក់ខាងលើដល់លោក Mourinho និងជំនួយការរបស់គាត់មានដូចជាលោក Joao Sacramento, Nuno Santos, Carlos Lalin និង Giovanni Cerra គឺក្រោយពីពួកគេបាត់បង់ការងារកាលពីដើមសប្តាហ៍នេះ។ ប៉ុន្តែយោងសារព័ត៌មាន Football Insider បញ្ជាក់ថាលោកMourinho ច្រានចោលការផ្តល់ជូននេះភ្លាមៗខណៈដែលរូបលោក និងជំនួយការរបស់គាត់ កំពុងសំរាកលំហែកាយ។ ក៏ព្រោះតែមិនចង់ឈប់សម្រាករយៈពេលយូរ លោក Mourinho ត្រូវបានក្លឹបយក្សស្កុតឡេន Celtic ចាត់ទុកជាបេក្ខភាពនាំមុខដើម្បីជំនួសតំណែងលោក Neil Lennon ផងដែរនាពេលនេះ។
ប្រភពខាងលើបន្តថា នៅក្នុងលក្ខណ្ឌការងារ ជំនួយការគ្រូបង្វឹកទាំង៥ នាក់នេះនិងត្រូវទទួលបានប្រាក់ឈ្នួលពលកម្មនឿយហត់ពេញលេញពីសំណាក់ក្លឹប Tottenham រហូតដល់ពួកគេរកការងារធ្វើនៅកន្លែងផ្សេងបាន។ ក៏ព្រោះលោក Mourinho តែម្នាក់គឺមានប្រាក់ខែគោល រហូតដល់ទៅ ១២.៥ លានផោនក្នុងមួយឆ្នាំ ដូច្នេះ Tottenham នឹងត្រូវចំណាយប្រាក់សរុបដល់ទៅ ២៥ លានផោនសម្រាប់បុរសវ័យ ៥៨ ឆ្នាំ រូបនេះមានកិច្ចសន្យានិងអស់សុពលភាពមុនឆ្នាំ២០២៣ឯណោះ៕
ប្រភពព័ត៍មាន៖ Sportsmole
