បរទេស៖ លោក Pep Guardiola អ្នកចាត់ការទូទៅរបស់ក្រុម Manchester City បានបញ្ជាក់ថា ការទទួលជ័យជម្នះធ្វើឲ្យមានអារម្មណ៍កាន់តែល្អជាមួយអ្នកគាំទ្រដែលបានចូលរួមទស្សនាដោយផ្ទាល់ ក្រោយពីបានផ្តួលក្រុម Tottenham ក្នុងលទ្ធផល ១-០ នៅកីឡដ្ឋាន Wembley ដើម្បីលើកពាន League Cup លើកទី៤ជាប់ៗគ្នា នៅពីមុខអ្នកគាំទ្រ៨០០០នាក់ កាលពីថ្ងៃអាទិត្យ។
គ្រាប់បាល់តែតបញ្ចូលទីរបស់ខ្សែការពារ Aymeric Laporte នៅរយៈពេល៨នាទីចុងក្រោយ បានផ្តល់ជ័យជម្នះដល់ក្រុម Man City ខណៈដែលពួកគេធ្វើឲ្យការរង់ចាំរបស់ Spurs ដើម្បីលើកពានមួយនៅតែបន្តច្រើនជាងរយៈពេល១៣ឆ្នាំ។ ជាលើកទី១ក្នុងរយៈពេល១៣ខែ ការប្រកួតកីឡាបាល់ទាត់នៅអង់គ្លេស បានអនុញ្ញាតឲ្យអ្នកគាំទ្ររបស់ក្រុមទាំង២ ចូលកីឡដ្ឋាន ដើម្បីជាការសាកល្បង នៅកីឡដ្ឋាន Wembley ខណៈដែលការរិតត្បិតជុំវិញករណីឆ្លងវីរុសកូរ៉ូណា ត្រូវបានបន្ធូរបន្ថយ។
លោក Guardiola បានឲ្យដឹងថា៖ «អ្នកគាំទ្រមិនបានចូលរួមទស្សនាពេញកីឡដ្ឋានឡើយ ប៉ុន្តែ វាល្អប្រសើរជាងមុន។ ការអបអរជាមួយនឹងពួកគេគឺជារឿងល្អ។ យើងបានលេងបានយ៉ាងល្អ។ យើងពិតជារីករាយណាស់ក្នុងការលើក៤ជាប់ៗគ្នាប៉ុន្តែ ជាពិសេសដោយសារតែក្នុងការប្រកួត៣៣លើកចុងក្រោយ យើងបានឈ្នះ៣០ប្រកួត»៕
ប្រភពព័ត៌មាន៖ Channel News Asia