បរទេស៖ លោក Pep Guardiola បានសារភាពថាក្រុមមេឃខៀវ Man City នឹងត្រូវបញ្ចេញអោយអស់ពីសមត្ថភាព ដើម្បីទប់ទល់ពីការវាយសម្រុករបស់ក្រុមគូប្រជែង Paris St Germain នៅក្នុងវគ្គពាក់កណ្តាលផ្តាច់ព្រ័ត្រក្របខ័ណ្ឌ Champions League នៅរាត្រីនេះនាកីឡាដ្ឋាន Parc Des Princes នៅទីក្រុងប៉ារីសរដ្ឋធានីនៃប្រទេសបារាំង។
អ្នកចាត់ការទូទៅសញ្ជាតិអេស្បាញបញ្ជាក់តថា៖ «ពួកគេសម្បូរទៅដោយកីឡាករកំពូលៗដែលមានសមត្ថភាពល្អអស្ចារ្យ ដូច្នេះយើងនឹងព្យាយាមបញ្ឈប់ពួកគេ។ យើងមិនល្អក្នុងផ្នែកការពារតែការគ្រប់គ្រងបាល់យើងលេងបានល្អ។ អ្វីដែលយើងធ្វើបានកន្លងមកគឺលេងស្មើជើងគ្នា។ ទោះបីយ៉ាងណាពេលវេលានេះយើងត្រូវបង្កើនកំលាំងទ្វេរដងដើម្បីទប់ទល់ជាមួយនឹងពួកគេ»។
ក្រុមកំពុងឈរលើកំពូលតារាង Premier League ទើបតែឈ្នះពាន League Cup ជាលើកទី៤ជាប់ៗគ្នាកាលពីថ្ងៃអាទិត្យ ខណៈ PSG ដែលជាក្រុមជើងឯករងកាលពីរដូវកាលមុនមានខ្សែប្រយុទ្ធឆ្នើមដ៏មុតស្រួចដូចជា Neymar Jr និង Kylian Mbappe ដែលអាចនឹងបង្កគ្រោះថ្នាក់ដល់គូរប្រកួតគ្រប់ពេលវេលាទាំងអស់។ គ្រូបង្វឹកដែលធ្លាប់ដឹកនាំក្លឹប FC Barcelona ឈ្នះពានរង្វាន់ Champions League ២ដងរូបនេះ បានដឹកនាំក្រុម Man City ឡើងមកកាន់វគ្គ៤ក្រុមចុងក្រោយនេះជាលើកទី២ហើយចាប់តាំងពីឆ្នាំ២០១៦មក៕
ប្រភពព័ត៍មាន៖ Sportsmole