បរទេស៖ ខ្សែបម្រើប្រយុទ្ធ Bruno Fernandes និងខ្សែប្រយុទ្ធ Edinson Cavani បានស៊ុតបាល់បញ្ចូលទី២គ្រាប់ដូចគ្នា ខណៈដែលក្រុម Manchester United បានបោះជំហានដ៏ធំឆ្ពោះទៅកាន់វគ្គផ្តាច់ព្រ័ត្រនៃក្របខ័ណ្ឌ Europa League តាមរយៈការវាយបកតាមពីក្រោយដើម្បីលត់ក្រុម Roma យ៉ាងចាស់ដៃក្នុងលទ្ធផល ៦-២ នៅកីឡដ្ឋាន Old Trafford។
គ្រាប់បាល់បើកឆាករបស់ Fernandes ត្រូវបានតាមស្មើដោយគ្រាប់បាល់ស៊ុតប៉េណាល់ទីរបស់កីឡាករ Pellegrini នៅមុនពេលខ្សែប្រយុទ្ធ Edin Dzeko បានជួយឲ្យក្រុម Roma នាំមុខវិញ នៅត្រឹមតង់ទី១។ ប៉ុន្តែ ក្រុមរបស់អ៊ីតាលីមួយនេះ បានបាត់បង់កីឡាករ៣នាក់ ដោយសារតែបញ្ហារួស នៅមុនពេលសម្រាកតង់ទី១ ហើយ Man United បានដណ្តើមយកប្រៀបតាមរយៈការបង្ហាញពីទម្រង់លេងយ៉ាងល្អនៅតង់ទី២ ដើម្បីបំពេញជ័យជម្នះយ៉ាងកក់ក្តៅរបស់ខ្លួនតែម្តង។ Man United កំពុងសម្លឹងរកការឈានទៅវគ្គផ្តាច់ព្រ័ត្រជាលើកដំបូង ក្រោមការដឹកនាំរបស់លោក Ole Gunnar Solskjaer ក្រោយពីបានរងបរាជ័យក្នុងវគ្គពាក់កណ្តាលផ្តាច់ព្រ័ត្រចំនួន៤លើកក្នុងរយៈពេល២រដូវកាលមកនេះ។ ប៉ុន្តែ ការរងបរាជ័យដ៏ធំនៅជើងទី២ ទើបអាចរារាំងក្រុមបិសាចក្រហមមួយនេះ មិនឲ្យឈានទៅវគ្គបន្តដើម្បីប៉ះជាមួយនឹងក្រុម Villarreal ឬ Arsenal ក្នុងទីក្រុង Gdansk នៅថ្ងៃទី២៦ ខែឧសភា។
ស្របពេលជាមួយគ្នានេះ លោក Unai Emery បានទទួលជ័យជម្នះពេលជួបគ្នាជាមួយនឹងអតីតក្រុមរបស់លោក Arsenal ប៉ុន្តែ ការដណ្តើមបានជ័យជម្នះ ២-១ អាចជារង្វាន់តិចតួចប៉ុណ្ណោះ សម្រាប់ក្រុម Villarreal ដែលមិនអាចដណ្តើមយកប្រៀបទាំងស្រុងលើការរងពិន័យកាតក្រហមរបស់ Dani Ceballos ក្នុងការប្រកួតជើងទី១នៃវគ្គពាក់កណ្តាលផ្តាច់ព្រ័ត្រ៕
ប្រភពព័ត៌មាន៖ Channel News Asia
