បរទេស៖ អ្នកគាំទ្រជាច្រើនពាន់នាក់ បានប្រមូលផ្តុំគ្នាតាមដងវិថីនានានៅទីក្រុង Milan ខណៈដែល Inter Milan បានឈ្នះពាន Serie A ជាលើកទី១របស់ពួកគេ ក្នុងរយៈពេល១១ឆ្នាំ ដើម្បីបញ្ចប់រជ្ជកាលគ្រប់គ្រងរយៈពេល៩ឆ្នាំជាប់ៗគ្នារបស់ក្លិប Juventus។
ក្រុមរបស់លោក Antonio Conte បានឈ្នះពានក្របខ័ណ្ឌ Serie A ជាលើកទី១៩ ក្រោយពីក្រុម Atalanta បានបញ្ចប់ក្នុងលទ្ធផលស្មើ ១-១ ជាមួយនឹងក្រុម Sassuolo ដើម្បីធ្វើឲ្យក្រុម Inter Milan នាំមុខ១៣ពិន្ទុដាច់ ខណៈដែលនៅសល់ការប្រកួតត្រឹមតែ៤លើកទៀតប៉ុណ្ណោះ។ Conte គឺជាអ្នកចាប់ផ្តើមបង្កើតកំណត់ត្រាគ្រប់គ្រងរបស់ Juventus តាមរយៈការឈ្នះពាន៣លើកដំបូងជាប់ៗគ្នា មុននឹងពួកគេបានបន្តឈ្នះ៩លើកជាប់ៗគ្នា ពោលគឺ ចាប់ផ្តើមពីឆ្នាំ២០១២ ដល់ឆ្នាំ២០២០។ បុរសវ័យ៥១ឆ្នាំរូបេះ បានចូលកាន់តំណែងក្នុងក្លិប Inter Milan ក្នុងឆ្នាំ២០១៩ និងបានលើកពាន Serie A ម្តងទៀត ក្រោយពីបានដឹកនាំឲ្យ Inter បញ្ចប់ក្នុងចំណាត់ថ្នាក់លេខ២ កាលពីរដូវកាលមុន។
លោក Conte ដែលក៏បានឈ្នះពានក្របខ័ណ្ឌ Premier League ជាមួយនឹង Chelsea កាលពីឆ្នាំ២០១៧ដែរនោះ បានឲ្យដឹងថា៖ «ការឈ្នះនេះ គឺជាការសម្រេចសមិទ្ធិផលមួយក្នុងចំណោមសមិទ្ធិផលដ៏អស្ចារ្យបំផុតក្នុងអាជីពរបស់ខ្ញុំ»។ បច្ចុប្បន្ន Inter គឺជាក្លិបជោគជ័យបំផុតលំដាប់ទី២នៅអ៊ីតាលី ក្រោយពីបានឈ្នះពានច្រើនជាងក្រុម AC Milan ចំនួន១លើក ប៉ុន្តែ នៅតែដេញឆ្ងាយតាមពីក្រោយ Juventus ដែលបានឈ្នះពានសរុប៣៦លើក៕
ប្រភពព័ត៌មាន៖ Channel News Asia