បរទេស៖ ក្រុមបិសាចក្រហម Man Utd នឹងត្រូវធ្វើការប្រកួតក្របខណ្ឌ Premier League ចំនួន៣ដងក្នុងរយៈពេលតែ៥ថ្ងៃ បន្ទាប់ពីការ ប្រកួតពន្យារពេលរបស់ពួកគេជាមួយក្រុមភ្ញៀវហង្សក្រហម Liverpool ត្រូវបានរៀបចំឡើងវិញនៅថ្ងៃព្រហស្បតិ៍ទី១៣សប្តាហ៍ក្រោយ។ ការប៉ះទង្គិចគ្នាកាលពីថ្ងៃអាទិត្យ ដោយសារអ្នកគាំទ្រដែលស្មោះស្ម័គ្រនឹងក្រុម Man Utd បានធ្វើការតវ៉ាប្រឆាំងនឹងក្រុមគ្រួសារដែលក្នុងនោះមួយចំនួនចូលអុកឡុកដល់ក្នុងទីលានក្នុងទឹកដីកីឡាដ្ឋាន Old Trafford តែម្តង។
ដូច្នេះមានន័យថា Man Utd ត្រូវជួបប្រកួតជាមួយក្រុមម្ចាស់ផ្ទះ Aston Villa នៅថ្ងៃទី៩ខែឧសភា និងបន្តបើកទ្វារកីឡដ្ឋានរបស់ខ្លួនទទួលក្រុមភ្ញៀវលេខ៣ Leicester នៅថ្ងៃទី១១ឧសភាមុនពេលជួបក្រុម Liverpool នៅថ្ងៃទី១៣ឧសភាតែម្តង។
ក្រុម Man Utd ក៏ត្រូវមានភារកិច្ចចូលរួមការប្រកួតជើងទី ២ វគ្គពាក់កណ្ដាលផ្ដាច់ព្រ័ត្រក្របខណ្ឌ UEFA Europa League នៅថ្ងៃព្រហស្បតិ៍នេះ នៅឯទឹកដី Roma ក្រោយផ្តួលក្រុមមកពីអ៊ីតាលីយ៉ាងចាស់ដៃក្នុងលទ្ធផល៦ទល់និង២ ខណៈដែលលោក Ole Gunnar Solskjaer ត្រូវបានគេយល់ឃើញថារូបលោកមិនមានអារម្មណ៏សប្បាយចិត្តចំពោះគណៈកម្មាការប្រកួតដែលបានការរៀបចំកាលវិភាគដ៏សែនមមាញឺក និងកៀកគ្នាមុនត្រៀមបិទបញ្ចប់រដូវកាលនេះ៕
ប្រភពព័ត៍មាន៖ Sportsmole
