បរទេស៖ ខ្សែប្រយុទ្ធ Sergio Aguero របស់ក្លិប Manchester City បានចេញមុខសុំ ទោស ចំពោះការស៊ុតបាល់ប៉េណាល់ទីមិនចូលទី ក្នុងពេលក្រុមខ្លួនរងបរាជ័យក្នុងលទ្ធផល ២-១ ក្នុងការប្រកួតក្របខ័ណ្ឌ Premier League ក្រោមស្នាដៃក្រុម Chelsea តាមរយៈការនិយាយថា «ការស៊ុតបាល់បែបនោះ គឺជាសម្រេចចិត្តខុស»។
Man City បាននាំមុខ ១-០ នៅពេលដែលពួកគេទទួលបានឱកាសក្នុងការបន្ថែមការនាំមុខរបស់ខ្លួន នៅមុនពេលសម្រាកតង់ទី១ ក្រោយពីអាជ្ញាកណ្តាលបានសម្រេចផ្តល់បាល់ប៉េណាល់ទី ក្រោយពីការប្រព្រឹត្តកំហុសរបស់ Billy Gilmour លើខ្សែប្រយុទ្ធ Gabriel Jesus ក្នុងប្រអប់ទី។ Aguero បានព្យាយាមស៊ុតបាល់ស្រាលដើម្បីបញ្ឆោតអ្នកចាំទី តាមរយៈការឆ្កិះបាល់សំដៅចំណុចកណ្តាល ប៉ុន្តែ អ្នកចាំទី Edouard Mendy របស់ Chelsea មិនបានលោតដើម្បីសង្គ្រោះបាល់ឡើយ និងអាចសង្គ្រោះបាល់យ៉ាងងាយស្រួល។
Man City នឹងក្លាយជាម្ចាស់ជើងឯកក្របខ័ណ្ឌលីក តាមរយៈការដណ្តើមបានជ័យជ្នះ ប៉ុន្តែ Chelsea បានស៊ុតបាល់បញ្ចូលទី២គ្រាប់វិញ បន្ទាប់ពីសម្រាកតង់ទី១។ បន្ទាប់ពីការប្រកួតនេះ Aguero ដែលជាអ្នករកបានគ្រាប់បាល់ច្រើនជាងគេរបស់ Man City បានសរសេរនៅលើបណ្តាញសង្គម Twitter ថា៖ «ខ្ញុំចង់សុំអភ័សទៅសចំពោះមិត្តរួមក្រុមរបស់ខ្ញុំ បុគ្គលិក និងអ្នកគាំទ្រ ចំពោះការស៊ុតបាល់ប៉េណាល់ទីមិនចូលទី»៕
ប្រភពព័ត៌មាន៖ Channel News Asia