បរទេស៖ គ្រាប់បាល់តាមស្មើនៅនាទី ទី៩៤របស់ Real Madrid បានជួយឲ្យពួកគេដណ្តើមបានលទ្ធផលស្មើ ២-២ ជាមួយនឹងក្រុម Sevilla កាលពីថ្ងៃអាទិត្យ ខណៈដែលការសម្រេចចិត្តផ្តល់បាល់ប៉េណាល់ទី បានផ្តល់ការមានប្រៀបលើការប្រជែងដណ្តើមពាន La Liga ដល់ក្រុម Atletico Madrid។
ក្រុមរបស់លោក Zinedine Zidane បានរកគ្រាប់បាល់តាមស្មើតាមរយៈកីឡាករ Marco Asensio នៅពាក់កណ្តាលតង់ទី២ និងបានគិតថា ពួក គេបានទទួលបាល់ប៉េណាល់ទី១គ្រាប់ហើយ នៅពេលដែល Karim Benzema ត្រូវបានទាញឲ្យដួល ក្រោយពីបានអូសបាលជុំវិញអ្នកចាំទី Bono របស់ Sevilla។ ប៉ុន្តែ ការពិនិត្យរូបភាពតាមរយៈវីដេអូជំនួយការអាជ្ញាកណ្តាល (VAR) បានធ្វើឲ្យលោកអាជ្ញាកណ្តាល Juan Martinez មើលឃើញថា កីឡាករ Eder Militao បានធ្វើឲ្យបាល់ប៉ះដៃនៅមុនហ្នឹងបន្តិច ហើយលោកក៏បានលុបចោលការផ្តល់បាល់ប៉េណាល់ទីសម្រាប់ Real Madrid តែបែរជាផ្តល់បាល់ប៉េណាល់ឲ្យ Sevilla ជំនួសវិញ។
Ivan Rakitic បានស៊ុតបាល់ប៉េណាល់ទីចូលទីយ៉ាងល្អ ហើយបើទោះបី Real បានរកគ្រាប់បាល់តាមស្មើវិញនៅនាទីបន្ថែមតាមរយៈកីឡាករ Toni Kroos ក៏ដោយ ប៉ុន្តែ លទ្ធផលស្មើនេះ នឹងផ្តល់ការមានប្រៀបដល់ក្រុម Atletico វិញ ក្នុងការប្រជែងដណ្តើមពានអេស្ប៉ាញ។ Atletico កំពុងតែនាំមុខ២ពិន្ទុទាំងលើក្រុម Real Madrid និង Barcelona ខណៈដែលបច្ចុប្បន្ន ពាន La Liga កំពុងតែធ្លាក់លើដៃរបស់ពួកគេវិញ៕
ប្រភពព័ត៌មាន៖ Channel News Asia
