បរទេស៖ AC Milan បានទម្លាក់ក្រុម Juventus ឲ្យធ្លាក់ចេញពីចំណាត់ថ្នាក់លេខ៤នៅលើតារាង Serie A តាមរយៈការដណ្តើមបានជ័យជម្នះក្នុងលទ្ធផល ៣-០ ក្នុងទីក្រុង Turin កាលពីថ្ងៃអាទិត្យ ដើម្បីបង្កើនក្តីសង្ឃឹមនៃការឈានទៅប្រកួតក្របខ័ណ្ឌ Champions League ជាលើកដំបូង បើគិតចាប់តាំងពីឆ្នាំ២០១៤។
កីឡាករ Brahim Diaz បានជួយឲ្យ AC Milan មានគ្រាប់បាល់នាំមុខមុន នៅមុនពេលសម្រាកតង់ទី១ ខណៈដែលកីឡាករ Anton Rebic និង Fikayo Tomori បានបន្ថែម២គ្រាប់ទៀត នៅក្នុងតង់ទី២ ក្រោយពី Franck Kessie បានស៊ុតបាល់ប៉េណាល់ទីមិនចូលទី។ AC Milan ឡើងទៅឈរក្នុងចំណាត់ថ្នាក់លេខ៣ ដោយមាន៧២ពិន្ទុស្មើជាមួយនឹងក្រុមឈរលេខ២ Atalanta ខណៈដែល Napoli ដេញតាមពីក្រោយ២ពិន្ទុក្នុងចំណាត់ថ្នាក់លេខ៤ ដែលជាកៅអីចុងក្រោយសម្រាប់ក្របខ័ណ្ឌ Champions League។
បច្ចុប្បន្ន Juventus ស្ថិតក្នុងចំណាត់ថ្នាក់លេខ៥ ដោយដេញតាមពីក្រោយក្រុមឈរលេខ៤ ចំនួន១ពិន្ទុ ខណៈដែលនៅសល់ការប្រកួត៣លើកទៀត រួមទាំងការប្រកួតជាមួយនឹងក្រុមម្ចាស់ជើងឯកទើបគ្រោងតំណែងថ្មី Inter Milan នៅចុងសប្តាហ៍ក្រោយ ផងដែរ។ ក្រុម Atalanta របស់លោក Gian Piero Gasperini កំពុងតែខិតកាន់តែកៀកក្នុងការឈ្នះកៅអីទៅលេងក្នុងក្របខ័ណ្ឌ Champions League ក្នុងរដូវកាលជាលើកទី៣ជាប់ៗគ្នា ខណៈដែលពួកគេនាំមុខលើ Napoli ២ពិន្ទុ ខណៈដែលនៅសល់ការប្រកួត៣លើកទៀត។ លោក Gasperini បានឲ្យដឹងថា៖ «នៅសល់រយៈពេល២សប្តាហ៍ទៀត ហេតុនេះ លទ្ធផលផ្សេងគ្នាជាច្រើនអាចកើតឡើង»៕
ប្រភពព័ត៌មាន៖ Channel News Asia