បរទេស៖ ក្រុមបិសាចក្រហម Manchester United ត្រូវបានគេរាយការណ៍ថាកំពុងរៀបចំសំណើរ ៨០ លានផោនសម្រាប់កីឡាករ Jadon Sancho របស់ក្លឹប Borussia Dortmund អំឡុងពេលទីផ្សារដោះដូរកីឡាកររដូវក្តៅខាងមុខនេះ។
បិសាចក្រហមត្រូវបានផ្សារភ្ជាប់យ៉ាងខ្លាំងជាមួយកីឡាករអន្តរជាតិអង់គ្លេសរូបនេះកាលពីឆ្នាំមុន ប៉ុន្តែពួកគេមិនបានឆ្លើយតបនឹងតម្លៃស្នើសុំរបស់ក្លឹប BVB ទេ ដែលត្រូវបានគេជឿជាក់ថាមានតំលៃដល់ទៅ ១០៨ លានផោន។ Sancho បានបង្ហាញទម្រង់យ៉ាងល្អសារជាថ្មីម្តងទៀតសម្រាប់ Dortmund នៅរដូវកាលនេះ ដោយរូបគេអាចរក ១៤ គ្រាប់និង Assists បាន ១៨ ដងក្នុងការបង្ហាញខ្លួន ៣៥ ដងក្នុងការប្រកួតទាំងអស់។
យោងតាមសារព័ត៌មាន Daily Star បានអោយដឹងថា Man United នឹងប្តេជ្ញាចិត្តក្នុងការចុះហត្ថលេខាលើកីឡាករវ័យ ២១ ឆ្នាំរូបនេះនៅក្នុងទីផ្សារនាពេលខាងមុខនេះអោយបានជាដាច់ខាត ហើយបច្ចុប្បន្នពួកគេកំពុងរៀបចំសំណើរ ៨០ លានផោនសម្រាប់កីឡាកររូបនេះ។ គួរបញ្ជាក់ផងដែលថាក្លឹប Chelsea និង Liverpool បានបង្ហាញការចាប់អារម្មណ៍លើ Jadon Sancho ផងដែរ៕
ប្រភពព័ត៍មាន៖ Sportsmole
