បរទេស៖ លោក Ronald Koeman កាលពីថ្ងៃចន្ទ បានបញ្ជាក់ថា ក្រុម Barcelona នៅតែ «ជឿជាក់» ថា ពួកគេអាចឈ្នះពាន La Liga ក្រោយពីបានជួបការខកចិត្តកាលពីចុងសប្តាហ៍ថ្មីៗនេះ ដែលនៅពេលនោះពួកគេត្រឹមតែអាចបញ្ចប់ក្នុងលទ្ធផលស្មើ ០-០ ជាមួយនឹងក្រុមកំពុងនាំមុខ Atletico Madrid។
ក្រុម Barcelona គួរតែបានឡើងឈរលើកំពូលតារាង ប៉ុន្តែ លទ្ធផលស្មើកាលពីថ្ងៃសៅរ៍ បានធ្វើឲ្យពួកគេស្ថិតក្នុងចំណាត់ថ្នាក់លេខ៣ ដោយដេញតាមពីក្រោយក្រុម Atletico ២ពិន្ទុ ហើយក៏តាមពីក្រោយក្រុម Real Madrid ផងដែរ ខណៈដែលនៅសល់ការប្រកួត៣លើកទៀត។ នៅមុនពេលការប្រកួតជាមួយនឹងក្រុម Levante នៅរាត្រីនេះ លោក Koeman បានប្រាប់សន្និសីទសារព័ត៌មានថា៖ «វាមិនស្ថិតក្នុងដៃយើងឡើយ ប៉ុន្តែ យើងនឹងមិនបង្កើតឲ្យមានកំហុសបន្ថែមទៀតឡើយ ហើយយើងនឹងដាក់សម្ពាធលើក្រុមផ្សេង។ យើងនឹងប្រឹងឲ្យអស់ពីសមត្ថភាពដើម្បីឈ្នះរហូតដល់វិនាទីចុងក្រោយ»។
លោកបានបន្ថែមទៀតថា៖ «ក្រុមនេះ ដែលមានភាពខ្លាំងទាំងស្មារតី និងកាយសម្បទារ នឹងក្លាយជាក្រុមដែលឈ្នះ ប៉ុន្តែ ខ្ញុំគិតថា រាល់ក្រុមទាំងអស់ នឹងព្យាយាមបញ្ចប់ការប្រជែងពាននៅចុងសប្តាហ៍នេះ»។ លោក Koeman ដែលបានចូលកាន់តំណែងកាលពីខែសីហា ឆ្នាំមុន បាននិយាយថា លោករំពឹងទុកថា នឹងបន្តដឹកនាំនៅរដូវកាលក្រោយ៕
ប្រភពព័ត៌មាន៖ Channel News Asia
