បរទេស៖ លោក Ronald Koeman ត្រូវបានបណ្តេញចេញក្នុងនាមជាគ្រូបង្វឹករបស់ក្លិប Barcelona ខណៈដែលអតីតខ្សែបម្រើលោក Xavi Hernandez គឺជាបេក្ខភាពទី១ដែលអាចនឹងមកជំនួសគ្រូបង្វឹករូបនេះ។
នេះបើយោងទៅតាមការប្រកាសរបស់ក្លិបកាលពីថ្ងៃពុធ។ ក្រុម Barcelona បានទទួលជ័យជម្នះត្រឹមតែ២លើកគត់ ក្នុងចំណោមការប្រកួត៧លើកចុងក្រោយក្នុងក្រខ័ណ្ឌលីក ក្រោមការដឹកនាំរបស់លោក Koeman ក្នុងនោះរាប់បញ្ចូលទាំងការរងបរាជ័យក្រោមស្នាដៃក្រុម Real Madrid ក្នុងការប្រកួត Clasico នាកីឡដ្ឋាន Camp Nou កាលពីថ្ងៃអាទិត្យផងដែរ។ លោក Koeman ត្រូវបានបណ្តេញចេញ ក្រោយពីការរងបរាជ័យក្នុងលទ្ធផល ១-០ នៅលើទឹកដីក្រុម Rayo Vallecano បានធ្វើឲ្យពួកគេធ្លាក់ទៅឈរលេខ៩ លើតារាង La Liga។
ការជួបលទ្ធផលដ៏ខកចិត្តជាបន្តបន្ទាប់ អាធ្វើឲ្យក្រុម Barcelona ខកខានក្នុងការឈ្នះកៅអីទៅលេងក្នុងក្របខ័ណ្ឌ Champions League នារដូវកាលក្រោយ ស្របពេលដែលក្លិបកំពុងតែមានវិបត្តិហិរញ្ញវត្ថុ។ លោក Xavi ដែលបច្ចុប្បន្នកំពុងតែដឹកនាំក្លិបកាតា Al Sadd ត្រូវបានចាត់ទុកថា ជាបេក្ខភាពឈានមុខគេក្នុងការមកជំនួសតំណែង។ ក្លិប Barcelona បានឲ្យដឹងក្នុងសេចក្តីថ្លែងការណ៍មួយថា៖ «ក្លិប FC Barcelona បានបញ្ចប់កាតព្វកិច្ចរបស់លោក Ronald Koeman ក្នុងនាមជាក្រុមជម្រើសដំបូងហើយ»៕
ប្រភពព័ត៌មាន៖ Channel News Asia