បរទេស៖ Atletico Madrid បានគ្រប់គ្រងអារម្មណ៍របស់ខ្លួនយ៉ាងល្អ ដើម្បីផ្តួលក្រុម Real Sociedad ក្នុងលទ្ធផល ២-១ កាលពីថ្ងៃអាទិត្យ និងបោះជំហានកាន់តែកៀកឆ្ពោះទៅកាន់ការលើកពានក្របខ័ណ្ឌ La Liga។
ខ្សែបម្រើស្លាប Yannick Carrasco និងខ្សែប្រយុទ្ធ Angel Correa បានជួយឲ្យក្រុម Atletico គ្រប់គ្រងការប្រកួតអាំងស្រុងក្នុងតង់ទី១ នៅមុនពេលពួកគេបានរងសម្ពាធវិញនៅតង់ទី២ និងបានជួបការភិតភ័យ ក្រោយពីកីឡាករ Igor Zubeldia បានរកគ្រាប់បាល់វាយបក១គ្រាប់វិញសម្រាប់ក្រុម Sociedad ខណៈដែលនៅសល់រយៈពេល៧នាទីចុងក្រោយ។ នៅពេលដែលសំឡេងកញ្ចែបញ្ចប់ការប្រកួតបានបន្លឺឡើង លោក Diego Simeone បានរត់ទៅកាន់ច្រកចេញនាកីឡដ្ឋាន Wanda Metropolitano ដោយបានសម្តែងនូវការរំភើបយ៉ាងខ្លាំង ដើម្បីបង្ហាញថា លទ្ធផលនេះ ពិតជាសំខាន់ណាស់។
នៅខាងក្រៅកីឡដ្ឋានឯនោះវិញ អ្នកគាំទ្រជាច្រើនរបស់ Atletico បានប្រមូលផ្តុំគ្នា ដើម្បីអបអរ និងច្រៀងចម្រៀង រហូតដល់បញ្ចប់ការប្រកួត ហើយនៅពេលដែលក្រុមរបស់ខ្លួនទទួលជ័យជម្នះ ក៏មានការដុតកាំជ្រួចផងដែរ។ ជ័យជម្នះនេះ ធ្វើឲ្យពួកគេនាំមុខ៤ពិន្ទុលើក្រុម Barcelona និង៥ពិន្ទុលើ Real Madrid ខណៈដែលក្រុមរបស់លោក Zinedine Zidane នឹងត្រូវធ្វើដំណើរទៅប្រកួតលើទឹកដីក្រុម Granada នៅរាត្រីនេះ៕
ប្រភពព័ត៌មាន៖ Channel News Asia
