បរទេស៖ លោក Zinedine Zidane បានបដិសេធថា លោកបានប្រាប់កីឡាកររបស់លោករួចជាស្រេចថា លោកនឹងលាលែងពីតំណែងក្នុងនាមជាគ្រូបង្វឹករបស់ Real Madrid នៅចុងរដូវកាលនេះ។
លោក Zidane ត្រូវបានគេចោទសួរម្តងទៀត អំពីអនាគតរបស់លោក ក្រោយពីក្រុម Real Madrid ដណ្តើមបានជ័យជម្នះ ១-០ នៅលើទឹកដីក្រុម Athletic Bilbao កាលពីថ្ងៃអាទិត្យ ខណៈដសែលជ័យជម្នះនេះ ជួយឲ្យពួកគេរក្សាការដេញតាមពីក្រោយក្រុម Atletico Madrid ចំនួន២ពិន្ទុ នៅមុនពេលឈានទៅកាន់សប្តាហ៍ចុងក្រោយនៃក្របខ័ណ្ឌ La Liga។ បើយោងទៅតាមវិទ្យុ Onda Cero និងគេហទំព័រ Goal កាលពីថ្ងៃអាទិត្យ លោក Zidane ដែលនៅជាប់កិច្ចសន្យារហូតដល់ឆ្នាំ២០២២ បានជូនដំណឹងដល់ក្រុមរបស់លោកកាលពី១សប្តាហ៍មុនថា លោកនឹងចាកចេញ ក្រោយពីការប្រកួតចុងក្រោយរបស់ក្រុម នៅចុងសប្តាហ៍នេះ។ ប៉ុន្តែ លោក Zidane បាននិយាយនៅក្នុងសន្និសីទសារព័ត៌មានបន្ទាប់ពីការប្រកួតកាលពីថ្ងៃអាទិត្យថា លោកមិនបាននិយាយប្រាប់កីឡាករអ្វីឡើយ។
គ្រូបង្វឹករូបនេះបានឲ្យដឹងថា៖ «កោតតែខ្ញុំនឹងប្រាប់កីឡាកររបស់ខ្ញុំថា ខ្ញុំនឹងចាកចេញនៅពេលនេះ? នេះគ្រាន់តែការកុហក់ប៉ុណ្ណោះ។ ខ្ញុំផ្តោតលើរដូវកាលនេះ។ នៅសល់ការប្រកួត១លើកទៀត ហើយយើងនឹងប្រឹងឲ្យអស់ពីសមត្ថភាព។ ខ្ញុំខ្វល់តែអ្វីដែលកើតឡើងនៅជុំផ្តាច់ព្រ័ត្រប៉ុណ្ណោះ»៕
ប្រភពព័ត៌មាន៖ Channel News Asia
