បរទេស៖ លោក Pep Guardiola អ្នកចាត់ការទូទៅរបស់ក្រុម Manchester City បានព្រមានដល់ Sergio Aguero ថា រូបគេនឹងគ្មានពេលក្នុងការសង់ទីម៉ង់ឡើយ នៅពេលដែលរូបគេត្រូវទទួលខុសត្រូវនៅតំបន់ជួរមុខក្នុងក្រុមរបស់ខ្លួនក្នុងការប្រកួតក្របខ័ណ្ឌ Champions League ជាមួយនឹងក្រុម Chelsea នៅចុងខែនេះ។
Aguero បានប្រកាសថា រូបគេនឹងចាកចេញពីក្លិប Man City នៅចុងបញ្ចប់នារដូវកាលនេះ ក្រោយពីបានចំណាយអស់រយៈពេល១០ឆ្នាំយ៉ាងជោគជ័យជាមួយនឹងក្រុមម្ចាស់ជើងឯក Premier League មួយនេះ។ ខ្សែប្រយុទ្ធសញ្ជាតិអាហ្សង់ទីនរូបនេះ គឺជាអ្នករកបានគ្រាប់បាល់ច្រើនជាងគេបំផុតរបស់ Man City ប៉ុន្តែ រូបគេប្រហែលជាមិនអាចមានកម្មវិធីលាគ្នាបែបសង់ទីម៉ឡើយ ក្នុងពេលបញ្ចប់យុទ្ធនាការនេះ ខណៈដែលការញាំញីដោយរបួស បានធ្វើឲ្យរូបគេបង្ហាញខ្លួនត្រឹមតែ១៨លើកប៉ុណ្ណោះ។ Aguero នឹងត្រូវអវត្តមានក្នុងការប្រកួតនៅលើទឹកដីក្រុម Brighton នៅរាត្រីនេះ ដោយសារតែបញ្ហាសាច់ដុំ។ រូបគេអាចនឹងវិលទៅបង្ហាញខ្លួនជាលើកចុងក្រោយនៅកីឡដ្ឋាន Etihad ពេលប៉ះជាមួយនឹងក្រុម Everton នៅថ្ងៃអាទិត្យ។
ប៉ុន្តែលោក Guardiola បានបដិសេធក្នុងការផ្តល់ការធានាថា កីឡាករវ័យ៣២ឆ្នាំរូបនេះ នឹងបង្ហាញខ្លួនក្នុងការប្រកួត Champions League វគ្គផ្តាច់ព្រ័ត្រជាលើកដំបូងរបស់ Man City នៅថ្ងៃទី២៩ ខែឧសភា។ ទាក់ទងនឹងការជ្រើសរើសក្រុម លោក Guardiola បានឲ្យដឹងថា៖ «ខ្ញុំនឹងនិយាយថា ខ្ញុំមានអារម្មណ៍ស្ងប់។ ខ្ញុំត្រូវតែសម្រេចចិត្តដោយផ្អែកលើជម្រើសដ៏ល្អបំផុតក្នុងការឈ្នះការប្រកួត»៕
ប្រភពព័ត៌មាន៖ Channel News Asia
