បរទេស៖ សាលាក្រុងម៉ាឌ្រីដ កំពុងតែដាក់ពង្រាយកម្លាំងប៉ូលិសចំនួន១៣០នាក់ ដើម្បីរារាំងមិនឲ្យទាំងអ្នកគាំទ្ររបស់ Atletico Madrid ឬ Real Madrid ធ្វើការអបអរ នៅកណ្តាលរដ្ឋធានីរបស់អេស្ប៉ាញមួយនេះ ក្នុងពេលដែលក្រុមរបស់ពួកគេឈ្នះពាន La Liga នៅថ្ងៃសៅរ។
សាលាក្រុងបានចេញក្តីថ្លែងការណ៍មួយកាលពីថ្ងៃព្រហស្បតិ៍ថា មន្ត្រីប៉ូលិសចំនួន១៣០នាក់ នឹងត្រូវល្បាតនៅមជ្ឈមណ្ឌលសំខាន់២ ដែលជាកន្លែងក្រុមទាំង២ ធ្វើការអបអរការឈ្នះពាន ដើម្បីការពារមិនឲ្យមានការប្រមូលផ្តុំក្នុងទ្រង់ទ្រាយធំ ដែលអាចបង្ករមានការឆ្លងវីរុសកូវីដ ១៩។ Atletico ដែលកំពុងតែនាំមុខ២ពិន្ទុលើក្រុម Real មុននឹងឈានទៅកាន់ការប្រកួតចុងក្រោយនៅលើទឹកដីក្រុម Real Valladolid ជាធម្មតាអបអរការឈ្នះពាននៅមជ្ឈមណ្ឌល Neptuno ដែលមានចម្ងាយប្រមាណជា៦០០ម៉ែត្រពី Cibeles ដែលជាកន្លែងអ្នកគាំទ្រ Real អបអរការឈ្នះពាន ប៉ុន្តែ ក្រុមទាំង២ នឹងមិនធ្វើដំណើរទៅទីនោះឡើយ បើទោះបីពួកគេឈ្នះពានក៏ដោយ។
លោកស្រី Inmaculada Sanz អ្នកនាំពាក្យសាលាក្រុង បានអំពាវនាវឲ្យអ្នកគាំទ្រធ្វើការអបអរនៅផ្ទះ ឬនៅក្បែរផ្ទះរបស់ខ្លួន និងជៀសវាងការប្រមូលផ្តុំគ្នានៅកណ្តាលទីក្រុងម៉ាឌ្រីដ៕
ប្រភពព័ត៌មាន៖ Channel News Asia