បរទេស៖ អតីតគ្រូបង្វឹក Chelsea លោក Frank Lampard បានឆ្លើយតបទៅនិងការរិះគន់ពីសំណាក់អតីតកូនក្រុមគឺខ្សែបម្រើ Jorginho ដែលបានធ្វើអត្ថាធិប្បាយថាអ្នកចាត់ការទូទៅសញ្ជាតិអង់គ្លេសរូបនេះមិនបានត្រៀមលក្ខណៈសម្បត្តិគ្រប់គ្រាន់ដើម្បីទទួលការងារជាគ្រូបង្វឹកក្លឹបនាពេលកន្លងមកនោះទេ។
វីរបុរសរូបនេះត្រូវបានក្លឹបបញ្ចប់តួនាទីនៅទឹកដី Stamford Bridge កាលពីចុងខែមករានិងប្តូរចូលជំនួសវិញដោយលោក Thomas Tuchel ស្របពេលគ្រូបង្វឹកអាឡឺម៉ង់រូបនេះ បានដឹកនាំក្រុមឈានទៅបញ្ចប់រដូវកាលក្នុងតំណែងTop-៤ ហើយត្រៀមឆ្ពោះទៅវគ្គផ្តាច់ព្រ័ត្រ Champions Leagueផងដែរ។
ថ្លែងប្រាប់គេហទំព័រ The Telegraph លោក Lampardបានឆ្លើយតបលើបញ្ហានេះថា «វាជាការពិតក្នុងនាមជាអ្នកចាត់ការម្នាក់នៅពេលដែលយើងចាកចេញពីក្លឹប ហើយកីឡាករដែលមិនបានចូលលេងច្រើននិងទៀងទាត់ពួកគេនិងចាប់ផ្តើមវិនិច្ឆ័យលើការងាររបស់យើងជាគ្រូបង្វឹក ដោយ ធ្វើការរៀបរាប់យ៉ាងដូច្នេះ»។ អតីតខ្សែបម្រើក្រុមជម្រើសជាតិអង់គ្លេសលោក Lampard បច្ចុប្បន្នត្រូវបានបណ្តាញសារពត៌មានចុះផ្សាយថា មានទំនាក់ទំនងចង់បានពីក្លឹប Crystal Palace ខណៈដែល Roy Hodgson បានបញ្ជាក់ថាគាត់នឹងចាកចេញពី Selhurst Park នៅចុងបញ្ចប់នៃរដូវកាលនេះ៕
ប្រភពព័ត៍មាន៖ Sportsmole
