បរទេស៖ ក្រុមហង្សក្រហម Liverpool និងតោខៀវ Chelsea បានឈ្នះកៅ២ចុងក្រោយសម្រាប់ក្របខ័ណ្ឌ Champions League ប៉ុន្តែ ក្រុម Leicester City បានធ្លាក់ចេញពីចំណាត់ថ្នាក់កំពូលទាំង៤ក្នុងរដូវកាលជាលើកទី២ជាប់ៗគ្នា នៅចុងក្រោយចុងក្រោយនៃក្របខ័ណ្ឌ Premier League នារដូវកាលនេះ កាលពីថ្ងៃអាទិត្យ។
Liverpool បានគេចផុតពីការខកចិត្ត ខណៈដែលពួកកេបានផ្តួលក្រុម Crystal Palace ក្នុងលទ្ធផល ២-០ ដើម្បីបញ្ចប់ដោយការឈរក្នុងចំណាត់ថ្នាក់លេខ៣ ហើយនេះគឺជាសមិទ្ធផលមួយក្នុងរដូវកាលដ៏ត្រដាបត្រដួស ដែលនៅពេលនោះ ការព្យាយាមការពានរបស់ពួកគេ បានបញ្ចប់យ៉ាងផុយស្រួយ។ Chelsea បានរងបរាជ័យក្រោមស្នាដៃក្រុម Aston Villa ក្នុងលទ្ធផល ២-១ ហើយលទ្ធផលនេះ ស្ទើរតែបានបញ្ចប់ក្តីសង្ឃឹមរបស់ពួកគេក្នុងការបញ្ចប់ក្នុងចំណាត់ថ្នាក់កំពូលទាំង៤ទៅហើយ។ ប៉ុន្តែ ក្រុមតោខៀវ ត្រូវបានជួយសង្គ្រោះដោយក្រុម Tottenham ដែលបានវាយបកតាមពីក្រោយ២លើក ដើម្បីដណ្តើមបានជ័យជម្នះក្នុងលទ្ធផល ៤-២ នៅលើទឹកដីក្រុម Leicester City។
ខ្សែប្រយុទ្ធ Harry Kane បានស៊ុតបាល់បញ្ចូលទីឲ្យក្រុម Spurs ដើម្បីឈ្នះស្បែកជើងមាសក្នុងក្របខ័ណ្ឌ Premier League ជាលើកទី៣ ក្រោយពីរកបាន២៣គ្រាប់ ស្របពេលដែល Gareth Bale បានស៊ុតបាល់បញ្ចូលទី២គ្រាប់ នៅជិតបញ្ចប់ការប្រកួត។ Liverpool បានបញ្ចប់រដូវកាលនេះ ដោយមាន៦៩ពិន្ទុ ខណៈដែល Chelsea មាន៦៧ពិន្ទុហើយ Leicester មាន៦៦ពិន្ទុ៕
ប្រភពព័ត៌មាន៖ Channel News Asia