បរទេស៖ Lille បានឈ្នះពានក្របខ័ណ្ឌ Ligue 1 ជាលើកដំបូងរបស់ខ្លួន បើគិតចាប់តាំងពីឆ្នាំ២០១១ ខណៈដែលពួកគេបានផ្តួលក្រុម Angers ក្នុងលទ្ធផល ២-១ កាលពីថ្ងៃអាទិត្យ ដើម្បីក្លាយជាក្រុមទី២ បើគិតចាប់តាំងពីឆ្នាំ២០១៣ ដែលបានបំបែកការគ្រប់គ្រងរបស់ Paris St Germain។
គ្រាប់បាល់ស៊ុតបញ្ចូលទី១គ្រាប់របស់ Jonathan David និងគ្រាប់បាល់ប៉េណាល់ទីរបស់ Burak Yilmaz បានជួយឲ្យក្រុមរបស់លោក Christophe Galtier រកបាន៨៣ពិន្ទុ ដោយនាំមុខ១ពិន្ទុពីលើក្រុមម្ចាស់ការពារជើងឯក PSG ដែលបានឈ្នះពាន៧ក្នុងចំណោមពានទាំង៨ចុងក្រោយ និងបានផ្តួលក្រុម Stade Brest ២-០ នៅថ្ងៃចុងក្រោយ។ លោក Galtier ដែលអាចនឹងចាកចេញពីក្លិបនេះ ក្រោយពីដឹកនាំបាន៤រដូវកាល ដោយសារតែការផ្លាស់ប្តូរប្រធានក្លិបនៅរដូវកាលនេះ បានឲ្យដឹងថា៖ «នេះគឺជាថ្ងៃប្រកួតដ៏យូរអង្វែង និងតានតឹង។ យើងបានលេងក្រោមសម្ពាធ ហើយការផ្តួលក្រុម PSG នៅថ្ងៃចុងក្រោយ គឺពិតជាអស្ចារ្យណាស់»។
ក្រុម Monaco ដណ្តើមបានលេខ៣ ដោយមាន៧៨ពិន្ទុ ដើម្បីឈ្នះកៅអីក្នុងក្របខ័ណ្ឌ Champions League បើទោះបីស្មើក្នុងលទ្ធផល ០-០ នៅលើទឹកដីក្រុម RC Lens ក៏ដោយ ខណៈដែល Olympique Lyonnais បានចាញ់ក្រោមស្នាដៃក្រុម Nice ៣-២ ដើម្បីបញ្ចប់ក្នុងចំណាត់ថ្នាក់លេខ៤ ដោយមាន៧៦ពិន្ទុ និងត្រូវទៅប្រកួតក្នុងក្របខ័ណ្ឌ Europa League៕
ប្រភពព័ត៌មាន៖ Channel News Asia
