បរទេស៖ ប្រភពពត៌មានអេស្បាញបានអោយដឹងថា Eden Hazard ចង់ចាកចេញពី Real Madrid នៅរដូវក្តៅនេះដោយមានបំណងចង់វិលត្រលប់ទៅកាន់អតីតក្រុមតោខៀវ Chelsea របស់ខ្លួនវិញ។
កីឡាករអន្តរជាតិប៊ែលហ្សិករូបនេះបានចាកចេញពីក្រុមមានមូលដ្ឋាននៅទីក្រុងឡុងដ៏ ទៅកាន់ក្លឹបមានមូលដ្ឋាននៅរាជធានីប្រទេសអេស្បាញក្នុងកិច្ចព្រមព្រៀងតម្លៃ ១៣០ លានផោនកាលពីរដូវក្តៅឆ្នាំ ២០១៩ ។ ទោះយ៉ាងណាខ្សែបម្រើ-ប្រយុទ្ធរូបនេះមិនទទួលបានជោគជ័យដូចនៅអង់គ្លេសនោះទេដោយសារតែត្រូវប្រឈម និងញាំញីពីបញ្ហារបួស ។
កីឡាករវ័យ ៣០ ឆ្នាំរូបនេះក៏ត្រូវបានប្រិយមិត្តគាំទ្រក្រុមអធិរាជសសម្តែងការមិនពេញចិត្តនិងខកបំណង ហើយរូបគេបានធ្វើការសុំទោសផងដែរបន្ទាប់ពីបានបង្ហាញសកម្មភាពរីករាយសប្បាយជាមួយអតីតមិត្តរួមក្រុម Kurt Zouma និងកីឡាករ Chelsea ដ៏ទៃទៀតក្រោយការប្រកួតពេលក្លឹបធ្លាក់ចេញពីក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រកាលពីដើមខែឧសភានេះ។ គួរបញ្ជាក់ថា Hazard បានចំណាយពេល ៧ រដូវកាលនៅទឹកដី Stamford Bridge និងជួយក្លឹបឈ្នះជើងឯក Premier League ២ ដងនិង FA Cup ព្រមទាំង Europa League ២ លើក៕
ប្រភពព័ត៍មាន៖ Metro
