បរទេស៖ លោក Ole Gunnar Solskjaer អ្នកចាត់ការទូទៅរបស់ក្រុម Manchester United បាននិយាយថា «ការទាត់តែ១ជើង» គឺជាចំណុចកាត់សេចក្តី ក្រោយពីក្រុមរបស់លោកបានរងបរាជ័យក្នុងការប្រកួតក្របខ័ណ្ឌ Europa League វគ្គផ្តាច់ព្រ័ត្រ ក្រោមស្នាដៃក្រុម Villarreal កាលពីថ្ងៃពុធ។
ក្រុមយក្សក្នុងក្របខ័ណ្ឌ Premier League មួយនេះនៅតែមិនទាន់ស្គាល់រសជាតិឈ្នះពានសោះក្នុងរយៈពេល៤ឆ្នាំ ក្រោយពីចាញ់ដោយការស៊ុតបាល់ប៉េណាល់ទីក្នុងលទ្ធផល ១១-១០ ក្រោយពីបានបញ្ចប់ក្នុងលទ្ធផលស្មើ ១-១ ក្នុងទីក្រុង Gdansk ខណៈដែលអ្នកចាំទី David de Gea បានស៊ុតបាល់ប៉េណាល់ទីចុងក្រោយមិនចូល។ លោក Solskjaer បានប្រាប់ទូរទស្សន៍ BT Sport ថា៖ «យើងមានការខកចិត្តពេលស្ថិតក្នុងបន្ទប់ផ្លាស់ប្តូរសម្លៀកបំពាក់។ នេះគឺជាកីឡាបាល់ទាត់សម្រាប់អ្នក។ ពេលខ្លះ ការប្រកួតត្រូវបានកាត់សេចក្តីដោយសារតែការទាត់១ជើងប៉ុណ្ណោះ ហើយនោះគឺជាភាពខុសគ្នារវាងការឈ្នះ និងចាញ់»។
លោកបានបន្ថែមទៀតថា៖ «យើងមិនហានងើយក្បាលឡើងលើឡើយ។ យើងមិនបានបង្ហាញពីទម្រង់លេងយ៉ាងល្អ ដូចដែលយើងអាចដឹងឡើយ។ យើងបានចាប់ផ្តើមលេងបាន ហើយពួកគេរកបានគ្រាប់បាល់។ ឱកាសតែ១លើករបស់ពួកគេតែចំគោលដៅតែម្តង។ យើងខកចិត្តណាស់ដែលបានរបូតគ្រាប់បាល់លឿនពេក។ យើងបានដាក់សម្ពាធ និងវាយសម្រុក ហើយយើងរកបានគ្រាប់បាល់។ ក្រោយរកបានគ្រាប់បាល់ យើងមិនបានគ្រប់គ្រងការប្រកួតដូចដែលយើងចង់ឡើយ»៕
ប្រភពព័ត៌មាន៖ Channel News Asia
