បរទេស៖ ខ្សែបម្រើ Kevin de Bruyne របស់ក្លិប Manchester City បានរងរបួសបាក់ឆ្អឹងច្រមុះ និងរបួសភ្នែក ក្នុងពេលក្រុមខ្លួនរងបរាជ័យក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ ក្រោមស្នាដៃក្រុម Chelsea កាលពីថ្ងៃសៅរ៍។
កីឡាករវ័យ២៩ឆ្នាំរូបនេះ ត្រូវបានប្តូរចេញនៅនាទី ទី៦០ ដោយជំនួសដោយកីឡាករ Gabriel Jesus ក្រោយពីបានប៉ះទង្គិចជាមួយនឹងខ្សែការពារ Antonio Rudiger។ De Bruyne បានសរសេរនៅលើបណ្តាញសង្គម Twitter ថា៖ «ខ្ញុំមិនអីទេពេលនេះ។ តែនៅតែខកចិត្តដោយសារតែលទ្ធផលកាលពីថ្ងៃម្សិលមិញ ប៉ុន្តែ យើងនឹងស្តារមុខមាត់វិញ»។ De Bruyne ត្រូវបានបញ្ចូលឈ្មោះក្នុងក្រុមបាល់ទាត់ជម្រើសជាតិបែលហ្ស៊ិក សម្រាប់យុទ្ធនាការ Euro ឆ្នាំ2020 ខណៈដែលការប្រកួតទី១របស់ក្រុមជម្រើសជាតិខ្លួន នឹងត្រូវប្រព្រឹត្តទៅនាថ្ងៃទី១២ ខែមិថុនា ដោយត្រូវប៉ះជាមួយនឹងក្រុមជម្រើសជាតិរុស្ស៊ី។ មិនមានសេចក្តីប្រកាសណាមួយដែលបង្ហាញថា តារាឆ្នើមរូបនេះ នឹងរឹងមាំទាន់ពេលសម្រាប់ការប្រកួតនៅទីក្រុង St Petersburg ឬក៏ថា របួសរបស់គេ កំពុងតែក្លាយជាឧបស័គ្គចំពោះរូបគេក្នុងយុទ្ធនាការនេះឡើយ។
Man City បានរងបរាជ័យក្នុងវគ្គផ្តាច់ព្រ័ត្រក្នុងទីក្រុង Porto ក្រោមស្នាដៃក្រុម Chelsea ដោយសារតែគ្រាប់បាល់ឈ្នះនៅនាទី ទី៤២របស់ Kai Havertz។ ខ្សែការពារ Rudiger បានសរសេរនៅលើបណ្តាញសង្គម Twitter កាលពីរសៀលថ្ងៃអាទិត្យដើម្បីបញ្ជាក់ពីការទាក់ទងរបស់គេទៅកាន់ De Bruyne ដើម្បីជូនពរឲ្យរូបគេឆាប់ជា៕
ប្រភពព័ត៌មាន៖ Channel News Asia
