បរទេស៖ គ្រូបង្វឹកថ្មីរបស់ក្លិប Real Madrid លោក Carlo Ancelotti បានហៅកីឡាករ Sergio Ramos ថាជាកីឡាករសំខាន់ ខណៈដែលមានការរំពឹងទុកជុំវិញអនាគតរបស់ខ្សែការពាររូបនេះ។
Ramos នៅតែមិនទាន់យល់ស្របលើកិច្ចព្រមព្រៀងថ្មីជាមួយ Real Madrid នៅឡើយទេ ខណៈរូបគេអាចនឹងចាកចេញពីទឹកដី Santiago Bernabéu ដោយគ្មានតម្លៃខ្លួននៅចុងបញ្ចប់ខែមិថុនា។ លោក Ancelotti ដែលបានវិលត្រឡប់មកកាន់ Real Madrid ជាអ្នកជំនួសកន្លែងរបស់លោក Zinedine Zidane បាននិយាយថាគាត់ចង់រក្សាខ្សែការពារដែលមានបទពិសោធន៍រូបនេះនៅក្លឹបបន្តទៀត។
ទោះបីជាយ៉ាងណាបុរសសញ្ជាតិអ៊ីតាលីរូបនេះបានបដិសេធមិនផ្តល់ការធានាណាមួយនៅពេលដែលនិយាយដល់រឿងកីឡាករវ័យ ៣៥ ឆ្នាំរូបនេះដែលត្រូវបានផ្សារភ្ជាប់ជាមួយនឹងការផ្លាស់ទៅកាន់ក្របខ័ណ្ឌ Premier League នៅរដូវកាលក្រោយ។ លោក Ancelotti បានប្រាប់អ្នកយកព័ត៌មាន៖ «ខ្ញុំគិតមិនចេញទេប្រសិនបើ Real Madrid មិនមាន Sergio Ramos នោះ។ វាច្បាស់ណាស់ថា Sergio Ramos គឺជាកីឡាករសំខាន់ណាស់ហើយជាមូលដ្ឋានគ្រឹះនៃភាពជោគជ័យជាច្រើននៅក្នុងក្លឹបនេះ»៕
ប្រភពព័ត៍មាន៖ Sportsmole
