គ្រូបង្វឹកប្រដាល់គុនខ្មែរលោក សួន ប៊ុនសូត្រ បានផ្ទុះកំហឹងទៅនឹងសកម្មភាពប្រកួតរបស់កូនប្រុសខ្លួន គឺអ្នកលេងជង្គង់ សួន ចាន់នី ដោយលោកបានចាត់ទុករបៀបប្រកួតរបស់ ចាន់នី ថាជាការប្រកួតបែបល្ងង់ និងភ្លើ ដែលមិនប្រើបញ្ញា និងបច្ចេកទេស ដើម្បីយកឈ្នះលើគូប្រកួត។
លោក សួន ប៊ុនសូត្រ បាននិយាយថា៖ «ការប្រកួតចាញ់គេនេះ ក៏ព្រោះតែវាមិនស្តាប់ពីការប្រើបច្ចេកទេស គឺវាមិនស្តាប់ខ្ញុំប្រាប់។ និយាយទៅវាវ៉ៃល្ងង់ណាស់ គឺមានប្រៀបលើដៃគូ តាំងពីទឹកទី១ ដោយទាត់ បោះជង្គង់ និងវាយឆ្ងាយ ប៉ុន្តែវាភ្លើពេក នៅទឹកទី៣ ទៅប្តូរកណ្តាប់ដៃជាមួយគេ»។
គ្រូបង្វឹកក្លិបបក្សីស្លាបដែកនៃសមាគមកីឡាក្រសួងមហាផ្ទៃ សួន ប៊ុនសូត្រ បានបន្ថែមថា៖«វាចាញ់គេនេះ សមមុខវាហើយ ព្រោះវាមិនប្រើបញ្ញា និងបច្ចេកទេសវ៉ៃ ក្នុងការប្រកួត តែបែរជាយកកម្លាំងដៃ ទៅវ៉ៃប្តូរជាមួយគេ ដែលជាអ្នកមានជំនាញប្រើកណ្តាប់ដៃស្រាប់»។
ការលើកឡើងរបស់លោក សួន ប៊ុនសូត្រ គឺសំដៅទៅលើការប្រកួតម៉ារ៉ាតុងដណ្តើមប្រាក់លាន រវាងជើងខ្លាំង សួន ចាន់នី និង ឡុង បេនលឿន នៅលើសង្វៀនថោន កាលពីថ្ងៃអាទិត្យ ដោយនៅក្នុងការប្រកួតនោះ សួន ចាន់នី ត្រូវបានចៅក្រមដាក់ពិន្ទុឱ្យចាញ់មិនឯច្ឆន្ទ ៤-១។
សួន ចាន់នី ធ្វើបានល្អ នៅទឹកទី១ និងទឹកទី២ ប៉ុន្តែសម្រាប់ការប្រកួតទឹកទី៣ចុងក្រោយ សួន ចាន់នី ត្រូវបាន ឡុង បេនលឿន វាយសម្រុកយ៉ាងខ្លាំង ហើយការម៉ាត់ចូលពេញៗរបស់ បេនលឿន ធ្វើឱ្យ សួន ចាន់នី ស្ទើសន្លប់ឈរទៅហើយ នៅមុនការប្រកួតបានបញ្ចប់។
លទ្ធផលនេះ បានធ្វើឱ្យក្តីរំពឹងនៃការឈ្នះប្រាក់លាន ជាលើកដំបូង របស់ សួន ចាន់នី ត្រូវបានរលួយបាត់ ដោយបានត្រឹមធ្លាក់នៅក្នុងវគ្គជម្រុះ៣ទឹក ទាំងសោកស្តាយ ចំណែក ឡុង បេនលឿន បានបន្តទៅផ្តួល ថៃ រ៉េត ឱ្យសន្លប់ នៅក្នុងទឹកទី២ ដើម្បីក្លាយជាម្ចាស់ជើងឯក អមដោយទឹកប្រាក់ចំនួន៣,៤លានរៀល។
ចំណែក សួន ចាន់នី បាននិយាយថា៖ «ខ្ញុំចាញ់ប្រៀបតែចុងទឹកទី៣ប៉ុណ្ណោះ ក្នុងការវាយប្តូរកណ្តាប់ដៃគ្នា ព្រោះកម្លាំងដៃវាយចេញរបស់គេ មានកម្លាំងធ្ងន់ល្អជាង កម្លាំងដៃរបស់ខ្ញុំ។ ម៉្យាងទៀត ខ្ញុំមានបញ្ហាចុកឈឺឆ្អឹងជំនីរ តាំងពីទឹកទី២ ដែលបានដួលទៅលើក្តារសង្វៀននៅពីក្រោមគាត់ ហេតុនេះខ្ញុំគ្មានកម្លាំង សម្រុកឱ្យខ្លាំងតាមចិត្ត ដែលចង់ឈ្នះ បាននោះឡើយ»។
ជាមួយគ្នានេះ ឡុង បេនលឿន បាននិយាយក្រោយការប្រកួតថា៖ «ខ្ញុំសង្ឃឹមតិចមែនទែន នៅពេលចាប់ឆ្នោតប៉ះ សួន ចាន់នី ដែលខ្ញុំធ្លាប់ចាញ់គាត់៣ដងមកហើយ ប៉ុន្តែពេលប្រកួតជាក់ស្តែង ដែលខ្ញុំតាំងចិត្តមិនញញើតនោះ នាំឱ្យខ្ញុំប្រើកណ្តាប់ដៃ នៅចុងទឹកទី៣ វ៉ៃចូលគោលដៅបានល្អ ពិសេសខ្ញុំទាត់ និងវាយបកទៅវិញ បានធ្វើឱ្យគាត់ដួលជាច្រើនលើកច្រើនសារ»។ ខ្ញុំមិនគិតថា គាត់ខ្សោយនោះទេ ប៉ុន្តែការទទួលបានជ័យជម្នះនេះ ដោយសារខ្ញុំបានហ្វឹកហាត់ខ្លាំង ចំនួន២សប្តាហ៍ពេញ រួមទាំងតាំងចិត្តប្រកួត ដោយខ្ញុំសម្រេចចូលវ៉ៃលុកចំគោលដៅល្អ»៕
