ក្រុមបាល់ទាត់ជម្រើសជាតិកម្ពុជា ដែលទើបបានបញ្ចប់បេសសកម្ម នៅក្នុងការប្រកួតជម្រុះជុំទី២ ប្រចាំពូលC នៃពានរង្វាន់ FIFA World Cup Qatar 2022 នៅលើទឹកដីប្រទេសបារ៉ែន នោះ មិនត្រូវបានអនុញ្ញាតឱ្យវិលទៅកាន់ក្លិប ឬរំសាយក្រុមភ្លាមៗនោះទេ គឺតម្រូវឱ្យធ្វើចត្តាឡីស័កចំនួន១៤ថ្ងៃសិន។
យ៉ាងណាក៏ដោយ ការធ្វើចត្តាឡីស័កនេះ សហព័ន្ធកីឡាបាល់ទាត់កម្ពុជា (FFC) ជាអ្នករាប់រងទៅលើក្រុមជម្រើសជាតិរបស់ខ្លួន ផ្ទាល់តែម្តង ដោយមិនដាក់ឱ្យធ្វើចត្តាឡីស័ក ក្រោមការគ្រប់គ្រងរបស់ក្រុមការងារក្រសួងសុខាភិបាលនោះទេ ពោលគឺលោក សៅ សុខា បានសម្រេចនាំយកក្រុមជម្រើសជាតិកម្ពុជា ទៅដាក់នៅមជ្ឈមណ្ឌលហ្វឹកហាត់របស់កងរាជអាវុធហត្ថ ដែលជាទីប្រសព្វរវាងខេត្តកំពង់ស្ពឺ និងខេត្តកំពង់ឆ្នាំង ព្រោះនៅទីនោះ មានតែទីធ្លាធំ អាចធ្វើការហ្វឹកហាត់បាន និងមានការផ្គត់ផ្គង់អាហារ និងការរស់នៅបានល្អ។
ជុំវិញនឹងការងារនេះ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានប្រាប់កាសែតក្នុងស្រុកមួយថា៖ «ក្រុមជម្រើសជាតិរបស់យើង ត្រូវធ្វើចត្តាឡីស័ករយៈពេល១៤ថ្ងៃ ទៅតាមការណែនាំរបស់ក្រសួងសុខាភិបាល ប៉ុន្តែយើងមិនឱ្យខាងក្រសួង យកយើងទៅធ្វើទេ»។
លោកបានបន្ថែមថា៖«ការធ្វើចត្តាឡីស័ក ក្រោមការគ្រប់គ្រងរបស់ក្រសួងសុខាភិបាលនោះ យើងអាចចំណាយច្រើន ជាពិសេសយើងមិនបានមើលថែក្មេងៗរបស់យើងដោយផ្ទាល់ដៃ ហើយក្មេងៗរបស់យើងក៏ត្រូវការកន្លែងហ្វឹកហាត់ និងត្រូវធ្វើអ្វីៗផ្សេងទៀតផងដែរ ហេតុនេះហើយទើបឯកឧត្តមប្រធានសហព័ន្ធ សៅ សុខា យកក្រុមជម្រើសជាតិរបស់យើង ទៅដាក់នៅក្នុងមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំរីករាយ ដែលទីតាំងនេះ មួយផ្នែកជាខេត្តកំពង់ស្ពឺ និងមួយផ្នែក ជាខេត្តកំពង់ឆ្នាំង»។
គួរបញ្ជាក់ថា សម្រាប់ការបំពេញបេសកកម្ម នៅលើទឹកដីបារ៉ែននេះ ក្រុមជម្រើសជាតិកម្ពុជា ដែលដឹកនាំផ្ទាល់ដោយអ្នកចាត់ការទូទៅ លោក Keisuke Honda និងគ្រូបង្គោលជនជាតិជប៉ុនលោក Ryu Hirose ទទួលលទ្ធផលមិនល្អទេ ដោយបានចាញ់ទាំង៣ប្រកួត គឺចាញ់ក្រុមបារ៉ែន ៨-០ ចាញ់ក្រុមអ៊ីរាក់ ៤-១ និងចាញ់ក្រុមអ៊ីរ៉ង់ ១០-០។
លទ្ធផលនេះ បានធ្វើឱ្យក្រុមជម្រើសជាតិកម្ពុជា បានបញ្ចប់ការប្រកួតទាំង៨លើករបស់ខ្លួន ប្រចាំពូលCនេះ ជាមួយការចាញ់៧ ស្មើ១ និងឈរនៅលេខរៀងទី៥ក្រោយគេ។យ៉ាងណាក៏ដោយ ទាំងសម្រាប់ការ៣លើកចុងក្រោយនេះ ក្រុមកម្ពុជា បានបង្ហាញការលេងយ៉ាងស្វិតស្វាញ ហើយការហ៊ានលេង និងលេងប្រាកដដោយភាពជឿជាក់នេះ ក៏បានធ្វើឱ្យគ្រូបង្វឹកក្រុមអ៊ីរ៉ាក់ និងអ៊ីរ៉ង់ មានការសរសើរដល់ទឹកចិត្តប្រកួតដ៏មុះមុតរបស់កីឡាករកម្ពុជា ផងដែរ ចំណែកអ្នកគាំទ្រភាគច្រើន ក៏ពេញចិត្ត សកម្មភាពប្រកួត នៅលើទីលានរបស់ក្រុមកម្ពុជា ផងដែរ ព្រោះពួកគេហ៊ានលេង និងលេងទៅតាមទម្រង់ និងរបៀបរបស់ខ្លួន ដោយមិនមានការភ័យខ្លាច៕
