ក្រុមជម្រើសជាតិកម្ពុជាអាយុក្រោម២៣ឆ្នាំ នឹងត្រូវប្រកួតបើកឆាករបស់ខ្លួន ក្នុងពូលB ជាមួយក្រុមជម្រើសជាតិឡាវ ក្នុងព្រឹត្តិការណ៍ស៊ីហ្គេម លើកទី៣១ ឆ្នាំ២០២១ នៅទីក្រុងហាណូយ ប្រទេសវៀតណាម នារសៀលម៉ោង៤ ថ្ងៃចន្ទនេះ ប៉ុន្តែក្រុមថៃ បានជួបការបរាជ័យដ៏គួរឱ្យភ្ញាក់ផ្អើលបំផុត។
នៅមុនការប្រកួតបើកឆាកនេះ ក្រុមជម្រើសជាតិកម្ពុជា បានត្រៀមខ្លួនរួចរាល់អស់ហើយ ហើយអ្នកចាត់ការទូទៅ លោក Keisuke Honda បានអះអាងថា កូនក្រុមរបស់លោក បានទម្លាក់ចោលសម្ពាធគ្រប់យ៉ាងអស់ទៅហើយ ហេតុនេះ ក្រុមគោព្រៃជំទង់កម្ពុជា នឹងគ្មានសម្ពាធអ្វីទាំងអស់ សម្រាប់ការប្រកួតបើកឆាកជាមួយក្រុមU23ឡាវ នៅថ្ងៃចន្ទនេះ។
តាមរយៈសហព័ន្ធកីឡាបាល់ទាត់កម្ពុជា លោក Keisuke Honda បាននិយាយនៅក្នុងការហ្វឹកហាត់ចុងក្រោយ កាលពីថ្ងៃអាទិត្យថា៖ «ថ្ងៃនេះ គឺជាការហ្វឹកហាត់ចុងក្រោយ សម្រាប់ការប្រកួតទី១។ យើងត្រូវយកសម្ពាធទាំងអស់ ដាក់ការហ្វឹកហាត់ នៅថ្ងៃនេះបើមិនដូច្នេះទេ យើងនឹងមានអារម្មណតានតឹង ឬពិបាកក្នុងខ្លួន»។
«យើងត្រូវរៀបចំខ្លួនឱ្យហើយ សម្រាប់ថ្ងៃស្អែក ដូច្នេះសម្រាប់ការប្រកួតថ្ងៃស្អែក (ថ្ងៃចន្ទនេះ) យើងនឹងមិនមានសម្ពាធអ្វីទាំងអស់»។ នេះជាការបញ្ជាក់បន្ថែមរបស់វីវបុរសបាល់ទាត់របស់ជប៉ុន លោក Keisuke Honda សម្រាប់ការចុះមកដឹកនាំក្រុមជម្រើសជាតិកម្ពុជា ផ្ទាល់ ក្នុងព្រឹត្តិការណ៍ស៊ីហ្គេម នៅប្រទេសវៀតណាម លើកនេះ។
យ៉ាងណាក៏ដោយ សម្រាប់ការបង្ហាញវត្តមាន សម្រាប់ការប្រកួតស៊ីហ្គេម លើកនេះ ក្រុមU23ឡាវ បានបង្ហាញទម្រង់លេងល្អ សម្រាប់ការប្រកួតបើកឆាកប្រចាំពូលB កាលពីថ្ងៃសៅរ៍ ដោយពួកគេ បានស្មើ ២-២ ជាមួយក្រុមសិង្ហបុរី ប៉ុន្តែក្រុមថៃ បានចាញ់ក្រុមម៉ាឡេស៊ី ២-១ បន្ទាប់ពីកីឡាករ Anusak Jaiphet បានភ្លាត់ធ្វើឱ្យបានចូលទីខ្លួនឯង នៅនាទីទី ៩០+៤ នោះ។
ជាមួយគ្នានេះ ក្រុមជម្រើសជាតិកម្ពុជា ក៏បានដកខ្សែប្រយុទ្ធ អ៊ាន ពិសី ចេញពីបញ្ជីរាយនាមកីឡាករជម្រើសជាតិ ទាំង២០នាក់ផងដែរ ដោយសារតែកីឡាកររូបនេះ មានបញ្ហារបួសចាស់ នៅកជើង ក្នុងកំឡុងពេលហ្វឹកហាត់ នៅវៀតណាម មិនអាចចូលរួមប្រកួតស៊ីហ្គេមនេះបាន ហើយជាមួយគ្នានេះ ក្រុមគ្រូបង្វឹកជម្រើសជាតិ បានសម្រេចយកខ្សែប្រយុទ្ធ ណារ៉ុង កក្កដា មកជំនួសទីតាំងរបស់ ពិសី ហើយកីឡាកររបស់ក្លិបកងយោពលខេមរភូមិន្ទ រូបនេះ បានធ្វើដំណើរទៅដលើទីក្រុងហាណូយ កាលពីម្សិលមិញ ដើម្បីចូលរួមជាមួយក្រុមជម្រើសជាតិ។
តែបទោះបីជាយ៉ាងណា គ្រូបង្គោលក្រុមជម្រើសជាតិកម្ពុជា លោក Ryu Hirose នៅតែជឿជាក់ថា កីឡាករវ័យក្មេងដ៏មានសក្តានុពលរបស់ខ្លួន នឹងបង្ហាញទម្រង់លេងបានល្អ ដើម្បីប្រជែងរកឱកាសឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ។
គ្រូបង្វឹកជនជាតិជប៉ុន លោក Ryu Hirose បានថ្លែង នៅក្នុងសន្និសីទកាសែត នៅប្រទេសវៀតណាមថា៖ «យើងដឹងហើយថា គ្រប់គ្នាមកទីនេះ គឺដើម្បីឈ្នះ ហើយជាមួយគ្នា ក្រុមជាច្រើននៅពូលផ្សេងៗ សុទ្ធតែបានប្រើប្រាស់កីឡាករលើសអាយុ ប៉ុន្តែយើងមិនប្រើប្រាស់កីឡាករលើសអាយុឡើយ ព្រោះយើងត្រៀមសម្រាប់ស៊ីហ្គេម ឆ្នាំ២០២៣ នៅកម្ពុជា ផងដែរ ហើយអ្នកនឹងអាចឃើញទម្រង់លេងរបស់យុវជន ដ៏មានសក្ដានុពលជាច្រើនរបស់យើង»។
«យើងចង់ទៅវគ្គពាក់កណ្ដាលផ្ដាច់ព្រ័ត្រ ព្រោះនេះជាលើកដំបូង ដែលខ្ញុំ និងលោក Honda បានមកទីនេះ និងចូលរួមស៊ីហ្គេម ហើយកម្មវិធីប្រកួត គឺពិតជាមមាញឹកណាស់ ដូច្នេះ យើងនឹងខំប្រឹងពីមួយប្រកួតទៅមួយប្រកួត»។ នេះជាការបញ្ជាក់បន្ថែមរបស់លោក Ryu Hirose៕
