គិតមកដល់ពេលនេះ អ្នកស្នេហាវិស័យកីឡាបាល់ទាត់ នៅកម្ពុជា ភាគច្រើន នៅតែមិនអស់ចិត្ត និងបានជែងសួរគ្នា ថាតើហេតុអ្វី សហព័ន្ធកីឡាបាល់ទាត់កម្ពុជា និងក្រុមគ្រូបង្វឹកជម្រើសជាតិ មិនដាក់កីឡាករលើសអាយុ២៣ឆ្នាំ ទៅចូលរួមការប្រកួតស៊ីហ្គេម លើកទី៣១ នៅប្រទេសវៀតណាម នាខែឧសភានេះ ខណៈលក្ខខណ្ឌនៃការប្រកួតនេះ បានអនុញ្ញាតដាក់កីឡាករលើសអាយុដល់ទៅ៣នាក់នោះ។
បញ្ហានេះ វានៅតែក្លាយជាប្រធានបទដ៏ក្តៅគគុក ដោយអ្នកខ្លះគិតថា ជារឿងមិនត្រឹមត្រូវ ដែលកម្ពុជាយើង បានដាក់តែកីឡាករអាយុក្រោម២៣ឆ្នាំទៅប្រកួតបែបនេះ ហើយអ្នកខ្លះទៀត បានពោលពាក្យបែបអាណិតអាសូរថា «គេលែងឱ្យតម្លៃ និងមើលឃើញកីឡាករលើសអាយុទៀតហើយ» ប៉ុន្តែក៏មានអ្នកខ្លះទៀត យល់ថា មកពីការដាក់កីឡាករលើសអាយុ ចូលទៅលេងជាមួយក្រុមU23 គឺការលេងមិនសូវស៊ីចង្វាក់គ្នា ដូចការប្រើកីឡាករU23សុទ្ធនោះទេ។
យ៉ាងណាក៏ដោយ ជុំវិញបញ្ហានេះ គ្រូជំនួយក្រុមជម្រើសជាតិកម្ពុជា លោក ភា សុភ័ក្រ្តា បានបកស្រាយថាថា៖ «យើងអត់បានចុះបញ្ជីកីឡាករលើសអាយុនោះទេ ដោយយើងផ្តោតទៅលើកីឡាករមានសក្តានុពល ព្រោះការប្រមូលផ្តុំនេះ យើងត្រៀមទាំងការប្រកួតស៊ីហ្គេម លើកនេះ និងស៊ីហ្គេម ឆ្នាំ២០២៣ នៅកម្ពុជា»។
តាមបញ្ជីរាយនាមកីឡាករជម្រើសជាតិកម្ពុជា ដែលសហព័ន្ធកីឡាបាល់ទាត់កម្ពុជា បានបញ្ចេញ កាលពីព្រឹកថ្ងៃចន្ទ គឺមានកីឡាករ២៦នាក់ ដែលអ្នកទាំងនេះ ត្រូវបានជ្រើសរើសចេញពីបញ្ជីឈ្មោះបឋមចំនួន៥០នាក់។ យ៉ាងណាក៏ដោយ អ្នកទាំង៦នេះ នឹងត្រូវធ្វើការជម្រុះចេញ៦នាក់ទៀត ដោយទុកត្រឹម២០នាក់ប៉ុណ្ណោះ ហើយបញ្ជីឈ្មោះចុងក្រោយ អាចនឹងត្រូវប្រកាស នៅថ្ងៃទី២ ខែឧសភា នៅមុនពេលក្រុមកម្ពុជា ចេញដំណើរទៅប្រទេសវៀតណាម។
លោក ភា សុភ័ក្រ្តា បានបន្ថែមថា៖ «ការចុះឈ្មោះបញ្ជីបឋម មានចំនួន៥០នាក់ ហើយយើងកោះហៅយក២៦នាក់នេះ ដើម្បីធ្វើការហ្វឹកហាត់ រួចចុងក្រោយជម្រុះចេញ៦នាក់ ដោយយើងទុក២០នាក់ យកទៅចូលរួម ជាផ្លូវការតែម្តង ហើយនៅក្នុងចំណោមអ្នកទាំង២០នេះ គឺក្នុងករណី ដែលកីឡាករមានកូវីដទេ ទើបយើងអាចដូរកីឡាករ នៅក្នុងបញ្ជីបឋមទាំង៥០នាក់ដំបូងបាន ប៉ុន្តែបើក្នុងករណីកីឡាករមានរបួស យើងមិនអាចផ្លាស់ប្តូរ បាននោះទេ»។
គួរបញ្ជាក់ថា សម្រាប់ការប្រកួតស៊ីហ្គេម លើកទី៣១ នៅប្រទេសវៀតណាម នាខែឧសភា ឆ្នាំ២០២២នេះ ក្រុមកម្ពុជា បានឈរនៅពូលB ដោយក្នុងនោះ កម្ពុជា ត្រូវប្រកួតបើកឆាក ជាមួយឡាវ នៅថ្ងៃទី៩ រួចបន្តទៅជួបក្រុមសិង្ហបុរី នៅថ្ងៃទី១១ និងប៉ះក្រុមថៃ នៅថ្ងៃទី១៤ ហើយចុងក្រោយជួបក្រុមម៉ាឡេស៊ី នៅថ្ងៃទី១៦ ខែឧសភា ខណៈពូលA មានក្រុមម្ចាស់ផ្ទះវៀតណាម ឥណ្ឌូនេស៊ី មីយ៉ាន់ម៉ា ហ្វីលីពីន និងក្រុមទីម័រខាងកើត៕
