ឯកឧត្តមឯកអគ្គរាជទូតជប៉ុនប្រចាំនៅកម្ពុជា លោក មិកាមិ បានឈានដល់ការរៀបចំការជួបជុំមួយ ជាមួយគ្រូបង្វឹកបាល់ទាត់ជប៉ុន រួមមានលោក Keisuke Honda អ្នកគ្រប់គ្រងទូទៅនៃក្រុមជម្រើសជាតិកម្ពុជា រួមទាំងមន្រ្តីកីឡាជប៉ុន គ្រូបង្វឹកជប៉ុន កីឡាករបាល់ទាត់ជប៉ុន ដែលកំពុងលេង នៅលីគកម្ពុជា និងតំណាងមកពីក្រុមហ៊ុនជប៉ុន ជាច្រើនទៀត ដើម្បីធ្វើការផ្លាស់ប្តូរយោបល រិះរកវិធីសាស្រ្ត ជួយអភិវឌ្ឍដល់វ័យបាល់ទាត់នៅកម្ពុជា ធ្វើយ៉ាងណា ឱ្យមានការរីកចម្រើន ហើយអាចឈានទៅទទួលបានជោគជ័យ ពេលកម្ពុជា ធ្វើជាម្ចាស់ផ្ទះស៊ីហ្គេម ឆ្នាំ២០២៣។
សម្រាប់ការជួបជុំដ៏កម្រមួយ កាលពីថ្ងៃទី២៧ ខែកុម្ភៈ កន្លងមកនេះ ឯកអគ្គរាជទូត ជប៉ុនប្រចាំនៅកម្ពុជា លោក មិកាមិ (MIKAMI) បានចាត់ទុកជំនួបនោះថា វាជាឱកាសដ៏ល្អ សម្រាប់ពួកគេ (ជនជាតិជប៉ុន) បានស្គាល់គ្នា និងរួមតែមួយ នៃកិច្ចខិតខំប្រឹងប្រែងរបស់ពួកគេក្នុងការគាំទ្រ កីឡាបាល់ទាត់កម្ពុជា ឆ្ពោះទៅកាន់ស៊ីហ្គេម ឆ្នាំ២០២៣ នៅក្នុងប្រទេសកម្ពុជា។
ឯកអគ្គរាជទូតលោក MIKAMI បានសម្តែងនូវក្តីសង្ឃឹមថា ភាគីពាក់ព័ន្ធទាំងអស់របស់ប្រទេសជប៉ុន នឹងខិតខំឱ្យអស់ពីសមត្ថភាព ក្នុងវិស័យរៀងៗខ្លួន ដើម្បីរួមចំណែកក្នុងការអភិវឌ្ឍប្រទេសកម្ពុជាបន្ថែមទៀត រួមទាំងវិស័យបាល់ទាត់ផងដែរ។
ដោយឡែក កាលពីថ្ងៃទី២៨ ខែកុម្ភៈ កន្លងមកនេះ អ្នកចាត់ការក្រុមជម្រើសជាតិកម្ពុជា លោក Keisuke Honda ក៏បានជួបពិភាក្សាជាមួយថ្នាក់ដឹកនាំក្រុមហ៊ុនលីគបាល់ទាត់កម្ពុជា ព្រមទាំងគ្រូបង្វឹក តំណាងឱ្យក្លិបទាំង៨ រួមមាន ភ្នំពេញក្រោន ព្រះខ័នរាជស្វាយរៀង វិសាខា ណាហ្គាវើលដ៍ បឹងកេត អង្គរថាយហ្គឺរ កងយោធពខេមរភូមិន្ទ និងក្រុមគិរីវង់សុខសែនជ័យ ដែលត្រូវប្រកួតប្រជែង នៅលីគកំពូលកម្ពុជា ឆ្នាំនេះផងដែរ។
នៅក្រោយការជួបជុំពិភាក្សានោះ វីរបុរសបាល់ទាត់ជប៉ុនលោក Keisuke Honda បានសរសេរបង្ហោះ នៅលើផេចហ្វេសប៊ុករបស់ខ្លួនថា៖ «ខ្ញុំបាននិយាយគ្នាជាមួយអ្នកចាត់ការទូទៅ និងគ្រូបង្វឹកទាំងអស់ តំណាងឱ្យក្លិប ត្រូវលេងនៅលីគកំពូលកម្ពុជា ឆ្នាំ២០២២នេះ កាលពីព្រឹកមិញ ដោយយើងបានពិភាក្សាជាច្រើន ពីប្រធានបទ ទាក់ទងទៅនឹងអនាគតនៃលីគកំពូលកម្ពុជា»៕
