អ្នកចាត់ការទូទៅក្លិបបាល់ទាត់ភ្នំពេញក្រោន លោក កែវ សុខង៉ន បានចេញមុខរិះគន់ទៅកាន់វីរបុរសបាល់ទាត់ជប៉ុន លោក Keisuke Honda ថា គ្រាន់តែជាគ្រូអនឡាញ គ្មានគុណភាព អាចដឹកនាំក្រុមជម្រើសជាតិកម្ពុជា ឱ្យទទួលបានជោគជ័យនោះទេ ហើយលោក Honda ក៏មិនប្រើបេះដូង មកស្រឡាញ់បាល់ទាត់កម្ពុជា ពិតប្រាកដនោះដែរ។
«ខ្ញុំរិះគន់ ដើម្បីស្ថាបនា! គឺលោក Honda ជាគ្រូអនឡាញ គ្មានគុណភាពអាចដឹកនាំក្រុមជម្រើសជាតិ បានជោគជ័យទេ ព្រោះគាត់គ្មានវេលាគ្រប់គ្រាន់ មកដឹកនាំផ្ទាល់។ គាត់ជាកីឡាករអាជីពដែរ ដូចនេះ គ្មានពេលគិតគូរក្រុមជម្រើសជាតិទេ ហើយការមកដឹកនាំពេលប្រកួតរយៈពេលខ្លី គឺមិនអាចទៅរួចនោះទេ គឺគ្មានគុណភាព»។
នេះជាអ្វី ដែលលោក កែវ សុខង៉ន បាននិយាយ ក្នុងការ Live កាលពីយប់មិញ ដើម្បីរិះគន់ពីការដឹកនាំក្រោមជម្រើសជាតិកម្ពុជា ពីសំណាក់លោក Keisuke Honda ហើយការរិះនេះ គឺស្របពេលដែលក្រុមU23ជម្រើសជាតិកម្ពុជា ក្រោមការដឹកនាំផ្ទាល់របស់លោក Honda បានធ្លាក់ចេញពីការប្រកួតពានរង្វាន់ AFF U23 Championship 2022 ត្រឹមវគ្គជម្រុះតាមពូល ក្នុងនាមជាម្ចាស់ផ្ទះ។
អតីតកីឡាករជម្រើសជាតិកម្ពុជា កែវ សុខង៉ន បាននិយាយទៀតថា៖ «លោក Honda មកដឹកនាំ មិនយកលុយ (Free) មែន តែនេះក៏ដោយសារកេរ្តិ៍ឈ្មោះរបស់គាត់ដែរ។ គាត់លះបង់ស្អីគេ? បើលះបង់ពិតមែន គាត់សុខចិត្តឈប់លេងបាល់ ហើយមករស់នៅកម្ពុជា ដើម្បីតាមដាន នៅដឹកនាំជាមួយជម្រើសជាតិកម្ពុជា ទើបហៅថា លះបង់ ហើយទទួលបានជោគជ័យ»។
អ្នកចាត់ការទូទៅក្រុមភ្នំពេញក្រោន រូបនេះ បានបន្ថែមថា៖ «បើថា លោកចង់បានប្រាក់ខែ ចាំរៃលុយពីប្រជាជនកម្ពុជា ម្នាក់១ដុល្លារ ឱ្យជាប្រាក់ខែក៏បាន។ ពេលការប្រកួតក្នុងលីគ គ្មានឃើញគ្រូ Honda មកមើលទេ ឃើញតែ Suzuki , Isuzu … មានតែគ្រូខ្មែរៗ ជាអ្នកទៅតាមដានកីឡាករ ជ្រើសរើសកីឡាករ។ ជិតដល់ថ្ងៃប្រកួតមកដល់ ពេលប្រកួតឈរ៩០នាទី មានន័យអ្វី?»។
បើទោះបីជា លោក កែវ សុខង៉ន បានអះអាងថា អ្វីដែលលោកបានលើកឡើងនេះ គ្រាន់តែជាការរិះគន់ស្ថាបនា ដើម្បីចង់ឱ្យបាល់ទាត់កម្ពុជាយើងរីកចម្រើន ដោយលោកខ្លួនឯក ក៏ធ្លាប់ឈឺចាប់ច្រើនលើកច្រើនសារ ចំពោះការចាញ់របស់ក្រុមជម្រើសជាតិ ប៉ុន្តែតាមរយៈការរិះគន់នេះ វាបាននឹងកំពុងក្លាយជាភ្លើងកំដៅដុតបញ្ឆោះទៅលើអារម្មណ៍របស់អ្នកគាំទ្រភាគច្រើន ដែលស្រឡាញ់ និងឱ្យតម្លៃទៅដល់ការលះបង់របស់លោក Honda មកដល់ក្រុមជម្រើសជាតិ កម្ពុជា។
ជាមួយគ្នានេះ ក៏មានអ្នកគាំទ្រមួយចំនួនតូច យល់ឃើញថា គួរតែមានការកែប្រែនៅចំណុខខ្លះ ចំពោះការដឹកនាំក្រុមកម្ពុជា របស់លោក Honda ផងដែរ ដើម្បីធ្វើឱ្យគុណភាពលេងរបស់ក្រុមកម្ពុជា កាន់តែមានភាពប្រសើរផងដែរ។ តែទោះបីជាយ៉ាងណា ប្រធានសហព័ន្ធកីឡាបាល់ទាត់កម្ពុជា លោក សៅ សុខា ធ្លាប់បានថ្លែងថា លោកមានការជឿជាក់ ទៅលើលោក Keisuke Honda និងក្រុមការងាររបស់គាត់ ក្នុងការជួយឱ្យកម្ពុជា ទទួលបានជោគជ័យ ក្នុងការប្រកួតស៊ីហ្គេម លើកទី៣២ ឆ្នាំ២០២៣ ដែលកម្ពុជា នឹងត្រូវធ្វើម្ចាស់ផ្ទះ ជាលើកដំបូង៕