សហព័ន្ធកីឡាបាល់ទាត់កម្ពុជា (FFC) បានបញ្ចេញបញ្ជីឈ្មោះក្រុមកីឡាករជម្រើសជាតិកម្ពុជា អាយុក្រោម២៣ឆ្នាំ សម្រាប់ត្រៀមទៅចូលរួមការប្រកួតស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម នាខែឧសភានេះ ជាផ្លូវការ នៅព្រឹកថ្ងៃចន្ទនេះ ប៉ុន្តែនៅក្នុងបញ្ជីឈ្មោះនេះ មិនទាន់ឃើញវត្តមានកីឡាករលើសអាយុ នៅឡើយទេ។
ដោយមានក្រុមគ្រូបង្វឹកជម្រើសជាតិ ជាអ្នកអនុវត្តផ្ទាល់ ទៅលើការជ្រើសរើសកីឡាករនេះ FFC បានប្រកាសឈ្មោះកីឡាករចំនួន២៦នាក់ ដែលត្រូវដាក់ឱ្យចូលរួម ការប្រកួតស៊ីហ្គេម លើកនេះ ហើយនៅក្នុងបញ្ជីឈ្មោះនេះ កីឡាកររបស់ក្រុមបឹងកេត ត្រូវបានជ្រើសរើសច្រើនជាងគេ។
តាមរយៈបញ្ជីរាយនាមកីឡាករជម្រើសជាតិកម្ពុជា សម្រាប់ព្រឹត្តិការណ៍ស៊ីហ្គេម លើកទី៣១ ឆ្នាំ២០២២នេះ កីឡាកររបស់ក្រុមបឹងកេត ចំនួន៥នាក់ ត្រូវបានជ្រើសរើស គឺមានចំនួនច្រើនជាងគេ។ បន្ទាប់មកគឺក្រុមខេត្តព្រៃវែង ដែលមាន៤នាក់ ចំណែកក្លិបភ្នំពេញក្រោន ព្រះខ័នរាជស្វាយរៀង វិសាខា និងណាហ្គាវើលដ៍ មាន៣នាក់ដូចគ្នា ហើយក្លិបអង្គរថាយហ្គឺរ មាន២នាក់ រីឯក្រុមកងយោធពលខេមរភូមិន្ទ គិរីវង់សុខសែនជ័យ និងក្រុមអគ្គិសនីកម្ពុជា មានចំនួន១នាក់ដូចគ្នា។
យ៉ាងណាក៏ដោយ នៅក្នុងបញ្ជីរាយនាមកីឡាកជម្រើសជាតិកម្ពុជានេះ គឺមានការផ្លាស់ប្តូរបេក្ខភាពមួយចំនួន បើប្រៀបធៀប ទៅនឹងបញ្ជីឈ្មោះ ការប្រកួតពានរង្វាន់ AFF U23 Championship 2022 ដែលកម្ពុជា បានធ្វើជាម្ចាស់ផ្ទះ កាលពីពេលថ្មីៗនេះ ហើយប្រធានក្រុម ទេស សម្បត្តិ ដែលកំពុងញ៉ាំញីដោយបញ្ហារបួសកជើងឆ្វេង នោះ ក៏គ្មានឈ្មោះ នៅក្នុងបញ្ជីនេះផងដែរ។
យ៉ាងណាក៏ដោយ សហព័ន្ធកីឡាបាល់ទាត់កម្ពុជា និងក្រុមគ្រូបង្វឹកក្រុមជម្រើសជាតិកម្ពុជា ដោយមានលោក Keisuke Honda ជាអ្នកចាត់ការក្រុមនោះ នៅមិនទាន់បានបង្ហាញបេក្ខភាពជាកីឡាករជម្រើសជាតិ លើសអាយុ ទាំង៣នាក់ នៅឡើយទេ ព្រោះការប្រកួតស៊ីហ្គេមលើកនេះ គេកំណត់ប្រើកីឡាករអាយុក្រោម២៣ឆ្នាំ បូកទាំងកីឡាករលើសអាយុ ចំនួន៣នាក់ ហើយបញ្ជីឈ្មោះសរុបនៃវិញ្ញាសាបាល់ទាត់នេះ ត្រូវបានម្ចាស់ផ្ទះវៀតណាម អនុញ្ញាតអាចឱ្យមានចំនួន៣០នាក់៕