បរទេស៖ ខ្សែប្រយុទ្ធ Gareth Bale ប្រធានក្រុមនៃក្រុមជម្រើសជាតិវេលស៍ បាននិយាយកាលពីថ្ងៃអង្គារថា អ្នកគាំទ្រដ៏ច្រើនកុះករ នៅទីក្រុង Baku ដែលកំពុងតែគាំទ្រក្រុមជម្រើសជាតិតួកគី ក្នុងការប្រកួតពូល A នៃព្រឹត្តិការណ៍ Euro 2020 របស់ពួកគេ នឹងលើកទឹកចិត្តដល់ក្រុមរបស់គេ។
ក្រុមរបស់ Bale នឹងត្រូវប៉ះជាមួយនឹងក្រុមជម្រើសជាតិតួកគី ដែលមានរហស្សនាមថា Crescent Stars នៅរាត្រីនេះ ហើយប្រជាជននៅអាស៊ែបៃហ្សង់ នឹងគាំទ្រក្រុមជម្រើសជាតិតួកគី ដោយសារតែមានទំនាក់ទំនងផ្នែកប្រវត្តិសាស្ត្រ និងវប្បធម៌រវាងទីក្រុង Ankara និង Baku។ បើយោងទៅតាមសហព័ន្ធកីឡាបាល់ទាត់អាស៊ែបៃហ្សង់ អ្នកគាំទ្រតួកគីចំនួន៤០០០នាក់ បានធ្វើដំណើរទៅកាន់ទីក្រុង Baku។ Bale បានឲ្យដឹងថា៖ «ភាពជាគូបដិបក្ខ គ្មានបញ្ហាឡើយ។ នេះគឺជារឿងដែលយើងត្រូវជួប។ យើងស៊ាំនឹងការលេងក្រៅដី និងពីមុខអ្នកគាំទ្រជាគូបដិបក្ខទៅហើយ។ នេះគឺជារឿងដែលយើងចូលចិត្ត។ មិនថា មានអ្វីក៏ដោយ វានឹងជួយលើកទឹកចិត្តយើងកាន់តែខ្លាំងលើទីលាន ហើយជាការរំពឹងទុក យើងអាចធ្វើឲ្យពួកគេស្ងាត់មាត់»។
ក្រុមជម្រើសជាតិវេលស៍ បានចាប់ផ្តើមយុទ្ធនាការរបស់ពួកគេ តាមរយៈការដណ្តើមបានលទ្ធផលស្មើ ១-១ ជាមួយនឹងក្រុមជ្រើសជាតិស្វ៊ីស ខណៈដែលតួកគី ចាញ់ក្រុមជម្រើសជាតិអ៊ីតាលី ក្នុងលទ្ធផល ៣-០ នៅថ្ងៃបើកឆាក៕
ប្រភពព័ត៌មាន៖ Channel New Asia
