បរទេស៖ ខ្សែការពារប្រវត្តិសាស្រ្តក្លឹបបិសាចក្រហម Man Utd លោក Rio Ferdinand ជឿជាក់ថាអតីតក្លិបរបស់លោកគួរតែផ្តល់អាទិភាពលើការចំណាយប្រាក់ទិញយក ខ្សែការពារកណ្តាលនិងខ្សែការពារស្លាបស្តាំនៅរដូវក្តៅនេះមុនពេលធ្វើការចំណាយប្រាក់ដែលត្រូវបានប៉ាន់ប្រមាណចំនួនមិនតិចជាង ១០០ លានផោនសម្រាប់នាំកីឡាករដែលអាចលេងតួនាទីបម្រើ-ការពារគឺ Declan Rice ពី ក្រុមញញួរធំ West Ham Utd។ សម្រាប់ Rice មានវ័យទើបតែ២២ ឆ្នាំក៏មានបំណងចង់ផ្លាស់ទៅកាន់ទឹកដី Old Trafford នៅរដូវកាលថ្មីនេះផងដែរ ប៉ុន្តែក្លឹបដែលមានមូលដ្ឋាននៅទីក្រុងឡុងដ៏បានដាក់តម្លៃខ្លួនខ្ពស់គឺជាមូលហេតុដែលធ្វើអោយ Man Utd កំពុងតែពិចារណា ។
គួរបញ្ជាក់ថា លោកOle Gunnar Solskjaer គឺជាគ្រូបង្វឹកដែលកោតសរសើរយ៉ាងខ្លាំងពីសមត្ថភាពកីឡាករអន្តរជាតិអង់គ្លេសរូបនេះ ហើយរូបលោកយល់ ឃើញថាRice គឺអាចដោះស្រាយវិបត្តិនៅតំបន់ការពារនេះបាន។គ្រូបង្វឹកសញ្ជាតិន័រវេសរូបនេះតែងផ្គូរផ្គងដាក់អោយ Scott McTominay និង Fred លេងចាប់ដៃគូគ្នានៅរយៈពេល ចុងក្រោយមុនបិទរដូវកាល។ ប៉ុន្តែរូបលោកក៏មានការប្រមើលមើលនិងចង់បាន ខ្សែការពារម្នាក់ទៀតដែលមានសមត្ថភាពជួយជ្រោមជ្រែងទៅដល់តំបន់បម្រើផងដែរ។
Man United ក៏មានទំនុកចិត្តក្នុងការផ្ទេរយកJadon Sancho ពី Dormund ផងដែរក្នុងរង្វង់ទឹកប្រាក់ ៨០ លានផោនសំរាប់ខ្សែបម្រើស្លាបរូបនេះ ប៉ុន្តែត្រូវរង់ចាំនូវ កិច្ចព្រមព្រៀង រហូតដល់បញ្ចប់ការប្រកួត ជើងឯកអឺរ៉ុបរួចរាល់សិន។ក្នុងនោះដែរខ្សែការពារដែលអាចលេងនៅខាងស្តាំ និងខាងឆ្វេងបានគឺ Kieran Trippier របស់ក្រុម Atletico Madrid ក៏ស្ថិតក្នុងបញ្ជីចង់បានរបស់ក្រុមជើងឯកអង់គ្លេស២០សម័យផងដែរ។ Man.Utd ក៏និងត្រៀមបញ្ចេញកីឡាករមួយចំនួនចេញពីក្រុមផងដែរ ប្រសិនទទួលបានការផ្តល់សំណើរសមរម្យក្នុងនោះដែរមានដូចជាJesse Lingard ,Diogo Dalot ,Phil Jones និង Brandon Williamsផងដែរ៕
ប្រភពព័ត៍មាន៖ Metro