បរទេស៖ Eden Hazard ប្រធានក្រុមនៃក្រុមបាល់ទាត់ជម្រើសជាតិបែលហ្ស៊ិក បាននិយាយកាលពីថ្ងៃអាទិត្យថា រូបគេមិនទាន់មានភាពរឹងមាំ១០០%ឡើយ ប៉ុន្តែរូបគេអាចចូលលេងក្នុងជម្រើសទាំង១១នាក់ដំបូងបានសម្រាប់ការប្រកួតចុងក្រោយក្នុងពូលរបស់ក្រុមខ្លួនក្នុងព្រឹត្តិការណ៍ Euro ឆ្នាំ2020 ដោជាមួយនឹងក្រុមជម្រើសជាតិហ្វាំងឡង់ ក្នុងទីក្រុង Saint Petersburg។
តារាឆ្នើមរបស់ក្លិប Real Madrid រូបនេះ បានជួបរដូវកាលដោយញាំញីដោយរបួស និងបានចូលលេងក្នុងនាមជាកីឡាករបម្រុងប៉ុណ្ណោះក្នុងពេលក្រុមជម្រើសជាតិបែលហ្ស៊ិក បានយកឈ្នះលើក្រុមជម្រើសជាតិរុស្ស៊ី និងដាណឺម៉ាក ក្នុងការប្រកួតបើកឆាកក្នុងពូល B។ ប៉ុន្តែ រូបគេបានដើរតួនាទីដ៏សំខាន់ក្នុងការប្រកួតចុងក្រោយនៅទីក្រុង Copenhagen តាមរយៈការជួយឲ្យ Kevin De Bruyne រកបានគ្រាប់បាល់ឈ្នះ ពេលប្រកួតជាមួយនឹងដាណឺម៉ាក។ នៅមុនពេលការប្រកួតជាមួយនឹងហ្វាំងឡង់ នៅរាត្រីនេះ Hazard បានឲ្យដឹងថា៖ «ខ្ញុំមិនរឹងមាំ១០០%ឡើយ ប៉ុន្តែ ខ្ញុំត្រៀមខ្លួនរួចរាល់ដើម្បីចូលលេងក្នុងជម្រើសដំបូង។ វាគឺជាផែនការ ចាប់តាំងពីចាប់ផ្តើមយុទ្ធនាការនេះ ក្នុងការវិឌ្ឍម្តងបន្តិចៗ រហូតទាល់តែខ្ញុំរឹងមាំ១០០% ក្នុងវគ្គចាញ់ធ្លាក់»។
បែលហ្ស៊ិក បានឈ្នះកៅអី ទៅវគ្គបន្តរួចជាស្រេច ប៉ុន្តែ ការដណ្តើមបាន១ពិន្ទុនាកីឡដ្ឋាន Krestovsky នឹងជួយឲ្យពួកគេបញ្ចប់ដោយការឈរលេខ១លើកំពូលតារាងនៃពូល៕
ប្រភពព័ត៌មាន៖ Channel News Asia
