អ្នកប្រយុទ្ធដែលមានចិត្តសឿង ក្នុងការវាយប្តូរ អេលីត សាន់ បានប្រើពេលសរុបមិនដល់៤ទឹកពេញលេញផង ដើម្បីក្រសោបបានតំណែងជើងឯក អមដោយប្រាក់រង្វាន់ចំនួន ៣,៤លានរៀល ពីការប្រកួតដណ្តើមប្រាក់លាន នៅលើសង្វៀនថោន កាលពីថ្ងៃអាទិត្យ ផ្ទុយពីនេះ កីឡាករដែលត្រូវបានគេរំពឹងថា អាចឈ្នះបានប្រាក់លាន វៀត ប៊ុនឌឿន បានធ្លាក់តាំងពីវគ្គជម្រុះ។
តាមរយៈការប្រកួត កាលពីថ្ងៃអាទិត្យនោះ ការប៉ះគ្នារវាង អេលីត សាន់ និង វៀត ប៊ុនឌឿន បានក្លាយជាការប្រកួត ដែលទទួលបានការចាប់អារម្មណ៍ខ្លាំង និងមានអ្នកចូលរួមទស្សនា តាមការផ្សាយផ្ទាល់ច្រើន ព្រោះនៅក្នុងការប្រកួត៣ទឹកនេះ អេលីត សាន់ និង វៀត ប៊ុនឌឿន បានវាយប្តូរកែងគ្នាយ៉ាងរន្ធើន បន្ថែមទៅលើការម៉ាត់ ទាត់ និងបុកជង្គង់។
យ៉ាងណាក៏ដោយ នៅតាមរយៈការវាយប្តូរគ្នានោះ គេមើលឃើញថា ការវាយចូលរបស់ អេលីត សាន់ ចំគោលដៅ និងមានទម្ងន់ធ្ងន់ជាង ជាហេតុនាំឱ្យចៅក្រមទាំង៥ បានផ្តល់ពិន្ទុឱ្យ អេលីត សាន់ ឈ្នះពិន្ទុ វៀត ប៊ុនឌឿន ដោយឯកច្ឆន្ទ ៥-០។ យ៉ាងណាក៏ដោយ ចំពោះការប្រកួតនេះ អេលីត សាន់ បាននិយាយថា៖ «ការប្រកួតជុំទី១ មានភាពស្វិតស្វាញមែនទែន ព្រោះ វៀត ប៊ុនឌឿន ល្អកែង ចំណែកខ្ញុំ បានព្យាយាមវាយត្រងយកពិន្ទុ ប៉ុន្តែការប្រកួតលើកនេះ ខ្ញុំក៏បានវាយកែងសងវិញច្រើនផងដែរ ដោយសារខ្ញុំ ចូលចិត្តវាយប្តូរបែបនេះ»។
ជាមួយគ្នានោះ កីឡាករជើងថ្មី ខាន់ ឃន បានបង្កើតឱ្យមានការភ្ញាក់ផ្អើល សម្រាប់ការបង្ហាញខ្លួនជាលើកដំបូង នៅក្នុងការប្រកួតដណ្តើមប្រាក់លាននេះ ដោយរូបគេ បានវាយឱ្យកីឡាករ ពុទ្ធ សំបូរ បាក់ក្តោងច្រមុះ និងបង្ខំចិត្ត បោះបង់ចោលការប្រកួត នៅពេលស្នូរជួងទឹកទី៣ បានបន្លឺឡើង។
យ៉ាងណាក៏ដោយ កីឡាករមានកម្ពស់ និងកាយសម្បទាល្អ ខាន់ ឃន មិនអាចតស៊ូជាមួយជើងខ្លាំង អេលីត សាន់ បានយូរនោះទេ សម្រាប់ការឡើងទៅជួបគ្នា នៅវគ្គផ្តាច់ព្រ័ត្រ គឺ ខាន់ ឃន ត្រូវបាន អេលីត សាន់ ម៉ាត់ចូលមុខ៣ដៃផ្តួនៗ បណ្តាលឱ្យគាំង និងត្រូវបានអាជ្ញាកណ្តាលរាប់ នៅពេលកណ្តាលទឹកទី២ ហើយស្ថិតក្នុងឱកាសដ៏ល្អនោះ សាន់ បានធាក់ចូលដើមទ្រូង ខាន់ ឃន ពេញមួយទំហឹង បណ្តាលឱ្យដួល ក្រោកលែងរួចតែម្តង។
ជារូប សម្រាប់ការបន្តឈ្នះប្រាក់លាន ជាលើកទី២ នៅលើសង្វៀនថោន លើកនេះ អេលីត សាន់ បានប្រើពេលមិនដល់៤ទឹកពេញផង ដើម្បីយកឈ្នះលើកីឡាករ វៀត ប៊ុនឌឿន និង ខាន់ ឃន ដើម្បីក្លាយជាម្ចាស់ជើងឯក។ តែទោះបីជាយ៉ាងណា អេលីត សាន់ បានសរសើទៅដល់ភាពអំណោតផលរបស់ ខាន់ ឃន ហើយរូបគេបានធ្វើការវាយតម្លៃថា កីឡាករវ័យក្មេងម្នាក់នេះ នឹងអាចមានឈ្មោះបោះសំឡេង នៅក្រៅស្រុក នាពេលអនាគត។ អេលីត សាន់ បានបញ្ជាក់ថា៖«ខាន់ ឃន មានរាងកាយល្អ មានកម្ពស់ខ្ពស់ ពិបាកក្នុងការវ៉ៃជាមួយគាត់ដែរ តែគាត់រាងនៅខ្ចីបន្តិច បើគាត់ចាស់បន្តិច ខ្ញុំក៏ពិបាកស៊ីគាត់ដែរ។ សម្រាប់អនាគត ខ្ញុំគិតថា បើសិនជា ខាន់ ឃន ដាក់ចិត្តក្នុងការហ្វឹកហាត់ជាមួយគុនខ្មែរ គាត់នឹងអាចល្បីនៅក្រៅស្រុក ដោយសារតែកម្ពស់កម្ពរ និងរាងកាយរបស់គាត់ គឺស័ក្តិសមជាកីឡាករម្នាក់»៕