បរទេស៖ ក្រុមបាល់ទាត់ជម្រើសជាតិអេស្ប៉ាញ គួរតែអាចបង្កើតឲ្យមានការងើងឆ្ងល់ក្នុងព្រឹត្តិការណ៍ Euro ឆ្នាំ២០២០ ប៉ុន្តែ លោកគ្រូបង្វឹក Luis Enrique បានបញ្ជាក់ថា លោកកើតឡើងជាមនុស្សមានសុទិដ្ឋិនិយម និងជឿជាក់ថា ស្រាសាំប៉ាញក្នុងកីឡាបាល់ទាត់ នឹងត្រូវហូរ នៅពេលប្រកួតជាមួយនឹងក្រុមជម្រើសជាតិស្លូវ៉ាគី នៅរាត្រីនេះ។
ក្រុមម្ចាស់ជើងឯក Euro ៣សម័យកាលរូបនេះ មិនអាចបំបែកតំបន់ការពារដ៏រឹងមាំរបស់ក្រុមជម្រើសជាតិស៊ុយអែត បានឡើយ ក្នុងពេលបញ្ចប់ក្នុងលទ្ធផលស្មើ ០-០ ក្នុងការប្រកួតបើកឆាករបស់ពួកគេ និងត្រឹមតែអាចបញ្ចប់ក្នុងលទ្ធផល ១-១ ជាមួយនឹងក្រុមជម្រើសជាតិប៉ូឡូញ ដែលមានន័យថា ពួកគេត្រូវតែផ្តួលស្លូវ៉ាគី ដើម្បីឈានទៅវគ្គ១៦ក្រុមចុងក្រោយ។ អេស្ប៉ាញ បានរងនូវការរិះគន់ជាច្រើនពីបណ្តារសារព័ត៌មាននានា ហើយ Rafael van der Vaart អតីតកីឡាករហូឡង់ បានលើកឡើងថា អេស្ប៉ាញ «មានទម្រង់លេងយ៉ាងអន់» ប៉ុន្តែ លោក Luis Enrique មិនបារម្ភឡើយ នៅមុនពេលការប្រកួតចុងក្រោយរបស់ពួកគេក្នុងពូល E។
គ្រូបង្វឹករូបនេះបានប្រាប់អ្នកយកព័ត៌មានថា៖ «Luis Enrique កើតមកជាមនុស្សមានសុទិដ្ឋិនិយម ហើយនិងស្លាប់ក្នុងនាមជាអ្នកមានសុទិដ្ឋិនិយម»។ ខ្ញុំមានការជឿជាក់១០០% ហើយខ្ញុំមានអារម្មណ៍ថា យើងដូចជាស្ថិតក្នុងដបស្រាសាំប៉ាញ ដែលរង់ចាំតែផ្ទុះចេញអ៊ីចឹង។ ខ្ញុំប្រាកដចិត្តថា នៅពេលដែលយើងឈ្នះ យើងនឹងឃើញពីភាពខ្លាំងរបស់យើង»៕
ប្រភពព័ត៌មាន៖ Channel News Asia