បរទេស៖ លោក Jose Mourinho បានលើកឡើងថាខ្សែបម្រើអន្តរជាតិព័រទុយហ្កាល់ Bruno Fernandes នៅមិនទាន់បានបង្ហាញទម្រង់លេងគួរអោយចាប់អារម្មណ៏នៅក្នុងព្រឹត្តិការណ៍ Euro ឆ្នាំ ២០២០ នៅឡើយទេ បើទោះបីជារូបគេចូលលេងបាន ២ប្រកួតកន្លងទៅសម្រាប់វគ្គសន្សំពិន្ទុនាពេលកន្លងទៅយ៉ាងណាក៏ដោយ។
អតីតខ្សែបម្រើស្លាបក្រុម Sporting រូបនេះមានសក្តានុពលមិនគួរឱ្យជឿពេលលេងនៅ Man Utd សម្រាប់រដូវកាល ២០២០-២០២១ នេះ បើទោះបីជាជួយក្លឹបបញ្ចប់ត្រឹមចំណាត់ថ្នាក់លេខ២ក្របខណ្ឌ Premier League និងត្រឹមជាម្ចាស់ជើងឯករងពានរង្វាន់ Europa League យ៉ាងណាក្តី។ អតីតគ្រូបង្វឹកក្រុមមាន់ខ្នាយមាស Tottenham ដែលត្រៀមទៅដឹកនាំក្លឹប Roma នៅរដូវកាលថ្មីបានបញ្ជាក់ប្រាប់គេហទំព័រ Talk Sport យ៉ាងដូច្នេះថា« ក្រុមព័រទុយហ្កាល់មានកីឡាករលំដាប់ពិភពលោកដូចជា Bernardo Silva, Cristiano Ronaldo និង Diogo Jota ព្រមទាំង Joao Felix ជាដើម ដូច្នេះពួកគេអាចផ្តួលគូបដិបក្សបានគ្រប់ពេល។ ប៉ុន្តែយើងត្រូវលេងជាមួយកីឡាករទាំង ១១ នាក់ ក្នុង ២ ប្រកួតបើកឆាកនេះ Bruno Fernandes បានត្រឹមតែបង្ហាញខ្លួនលើទីលាន ប៉ុន្តែមិនមានសកម្មភាពគួរចាប់អារម្មណ៏ទេ»។
លោក Mourinho បន្តថា៖ «ខ្ញុំសង្ឃឹមថាគាត់នឹងបង្ហាញទម្រង់លេងបានល្អពេលជួបបារាំងវគ្គជម្រុះចែកពូលចុងក្រោយនៅយប់ថ្ងៃពុធនេះនិងអាចរកបានគ្រាប់បាល់បានមិនថាបាល់ប៉េណាល់ទី និងបាល់ពិន័យហ្រ្វីឃីកឡើយ»៕
ប្រភពព័ត៍មាន៖ Goal
