ការប្រកួតពានរង្វាន់ League Cup ឬពានរង្វាន់លីគខាប់ ឆ្នាំ២០២១ ដែលរៀបចំឡើង ដោយគណៈកម្មការប្រកួតបាល់ទាត់ជាតិកម្ពុជា (CNCC) របស់សហព័ន្ធកីឡាបាល់ទាត់កម្ពុជា (FFC) នៅតែបន្តជាប់គាំង ដោយត្រូវលើកពេលប្រកួត ហើយមិនទាន់កំណត់កាលបរិច្ឆេទជាថ្មី ខណៈកីឡាករម្នាក់ នៅក្នុងក្លិប ដែលបានឆ្លងផុតការប្រកួតវគ្គជម្រុះតាមពូលទាំង២ ត្រូវបានរកឃើញវិជ្ជមានជំងឺកូវីដ១៩នោះ។
វាមិនមែនជាលើកទី១នោះទេ ដែល CNCC បានលើកពេល ឬលុបចោលការប្រកួតក្រោយរកឃើញថា មន្រ្តី និងកីឡាកររបស់ក្លិបមួយចំនួន បានជាប់សង្ស័យ ឬបានឆ្លងជំងឺកូវីដ១៩ ព្រោះគិតចាប់តាំងពីការប្រកួតលីគខាប់ ឆ្នាំ២០២១ បានចាប់ផ្តើម កាលពីថ្ងៃទី៥ ខែមិថុនា រហូតដល់ពេលនេះ CNCC បានសម្រេចលុបចោលការប្រកួត រហូតដល់៨ នៅក្នុងចំណោមការប្រកួតវគ្គជម្រុះតាមពូលទាំង២ សរុបចំនួន១២លើក។
នៅក្នុងនោះ ក្រុមបឹងកេត ក្រុមយុវជនសាលាបាល់ទាត់ជាតិបាទីអាយុក្រោម១៨ឆ្នាំ ក្រុមភ្នំពេញក្រោន និងក្រុមអាយអេសអាយដង្កោសែនជ័យ សុទ្ធតែត្រូវបានដកឈ្មោះចេញពីការប្រកួតនេះ បន្ទាប់ពីរកឃើញថា មន្រ្តីកីឡា និងកីឡាករមួយចំនួនរបស់ក្រុមទាំងនេះ បានជាប់សង្ស័យ និងខ្លះបានឆ្លងជំងឺកូវីដ១៩។
ជារួម មានតែក្រុមវិសាខា ព្រះខ័នរាជស្វាយរៀង ក្រុមកងយោធពលខេមរភូមិន្ទ (ទ័ព) និងក្រុមខេត្តព្រៃវែង ដែលមិនបានជួបបញ្ហាករណីឆ្លងជំងឺកូវីដ១៩ នៅក្នុងការប្រកួតជម្រុះតាមពូលទាំង២នេះ។ តាមរយៈការប្រកួតជម្រុះតាមពូលទាំង២ ដែលទើបបានបញ្ចប់ កាលពីថ្ងៃសៅរ៍ ទី១៩ ខែមិថុនា ក្រុមវិសាខា បានជាប់លេខ១ប្រចាំពូលA ព្រោះបានឈ្នះលើក្រុមបឹងកេត ភ្នំពេញក្រោន និងក្រុមអាយ អេស អាយ ដង្កោសែនជ័យ ដោយស្វ័យប្រវត្តិដូចគ្នា។
ចំណែកក្រុមទ័ព បានលេខ១ប្រចាំពូលB បន្ទាប់ពីពួកគេបានយកឈ្នះក្រុមព្រះខ័នារាជស្វាយរៀង ដោយការទាត់បាល់ប៉េណាល់ទី ៥-៣ ក្រោយស្មើគ្នា ១-១ ក្នុងការប្រកួតជម្រុះលើកទី៣ ចុងក្រោយ កាលពីថ្ងៃសៅរ៍នោះ ហើយក្រុមស្វាយរៀង ឈរនៅលេខ២ រីឯក្រុមខេត្តព្រៃវែង ដែលឈរនៅលេខ៣ ជាមួយការឈ្នះ១ និងចាញ់១ប្រកួតនោះ បានធ្លាក់ចេញពីការប្រកួតនេះហើយ។
ដោយសារតែបេក្ខភាព ត្រូវឡើងទៅវគ្គបន្ត មានតែ៣ក្រុមបែបនេះ CNCC បានកំណត់ឱ្យក្រុមទ័ព ឡើងទៅឈរចាំនៅវគ្គផ្តាច់ព្រ័ត្រ ដោយស្វ័យប្រវត្តិតែម្តង ចំណែកក្រុមលេខ១ពូលA វិសាខា ត្រូវប្រកួតវគ្គពាក់កណ្តាលផ្តាច់ព្រ័ត្រជាមួយក្រុមលេខ២ពូលB ព្រះខ័នរាជស្វាយរៀង ដើម្បីរកក្រុមឈ្នះឡើងទៅវគ្គផ្តាច់ព្រ័ត្រ។
តែទោះបីជាយ៉ាងណា សម្រាប់ការប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ នៃពានរង្វាន់លីគខាប់ នេះ នៅតែជាប់គាំង ហើយមិនទាន់ដឹងថា នឹងអាចរៀបចំបានឡើងវិញ នៅពេលណាឱ្យប្រាកដនោះទេ ព្រោះកាលពីថ្ងៃពុធ ម្សិលមិញនេះ CNCC បានប្រកាសថា បានលើកពេលការប្រកួតទាំង២ដំណាក់កាលនេះ ដោយមូលហេតុថា បានរកឃើញនូវករណីវិជ្ជមាននៃជំងឺកូវីដ១៩ ទៅលើកីឡាករម្នាក់របស់ក្រុមកងយោធពលខេមរភូមិន្ទ កាលពីថ្ងៃទី២០ ខែមិថុនា ឆ្នាំ២០២១៕