បរទេស៖ ក្រុមបាល់ទាត់ជម្រើសជាតិបែលហ្ស៊ិក មិនមានការបារម្ភចំពោះការជួបជាមួយនឹងក្រុមម្ចាស់ការពារតំណែងជើងឯកព័រទុយហ្គាល់ ក្នុងការប្រកួតវគ្គបន្ទាប់នៃព្រឹត្តិការណ៍ Euro ឆ្នាំ២០២០ ឡើយ ដោយចាត់ទុកថា ការជួបគូប្រកួតដែលខ្សោយជាងនេះ អាចនឹងធ្វើឲ្យពួកគេបាត់បង់នូវភាពមុតស្រួច។ នេះបើយោងទៅតាមការលើកឡើងរបស់ខ្សែការពារ Toby Alderweireld កាលពីថ្ងៃព្រហស្បតិ៍។
ក្រោយពីក្រុមជម្រើសជាតិព័រទុយហ្គាល់ បានបញ្ចប់ក្នុងចំណាត់ថ្នាក់លេខ៣ ក្នុងពូល F បន្ទាប់ពីបានបញ្ចប់ក្នុងលទ្ធផលស្មើ ២-២ ជាមួយនឹងក្រុមជម្រើសជាតិបារាំង កាលពីថ្ងៃពុធ កីឡាកររូបនេះបានប្រាប់អ្នកយកព័ត៌មានថា៖ «ខ្ញុំគិតថា អ្នកមិនអាចរីករាយ ឬពេញចិត្តអំពីគូប្រកួតឡើយ»។ ក្រុមបាល់ទាត់ជម្រើសជាតិអាល្លឺម៉ង់ បានវាយបកតាមស្មើក្រុមជម្រើសជាតិហុងគ្រី ក្នុងលទ្ធផល ២-២ ដើម្បីបញ្ចប់ដោយការឈរលេខ២ក្នុងពូល F ខណៈដែលព័រទុយហ្គាល់ ត្រឹមតែអាចទៅវគ្គបន្តក្នុងនាមជាក្រុមលេខ៣ បន្ទាប់ពីផ្តួលហុងគ្រី ៣-១ នៅថ្ងៃបើកឆាក មុននឹងចាញ់ក្រោមស្នាដៃក្រុមអាល្លឺម៉ង់ ៤-២។
ដោយឡែក ក្រុមជម្រើសជាតិបែលហ្ស៊ិក បានចាប់ផ្តើមយ៉ាងល្អ តាមរយៈការផ្តួលក្រុមជម្រើសជាតិរុស្ស៊ី ៣-០ មុននឹងបន្តផ្តួលក្រុមដាណឺម៉ាក ២-១ និងហ្វាំងឡង់ ២-០ ដើម្បីបញ្ចប់ក្នុងចំណាត់ថ្នាក់លេខ១ក្នុងពូល។ Alderweireld បានបញ្ជាក់ថា៖ «ប្រសិនបើយើងត្រូវប៉ះក្រុមជម្រើសជាតិហុងគ្រីវិញ នោះគ្រប់គ្នាចាប់ផ្តើមគិតថា នេះនឹងក្លាយជាការប្រកួតដ៏ងាយស្រួល។ ពេលនេះ យើងនឹងត្រូវជួបក្រុមខ្លាំងមួយ ដែលនឹងបង្ខំឲ្យយើងប្រឹងឲ្យអស់ពីសមត្ថភាពក្នុងតំបន់ប្រយុទ្ធ»៕
ប្រភពព័ត៌មាន៖ Channel News Asia
