បរទេស៖ ក្លិបបិសាចក្រហម Manchester United បានយល់ព្រមទិញខ្សែប្រយុទ្ធអន្តរជាតិអង់គ្លេស Jadon Sancho ពីក្លិប Borussia Dortmund ក្នុងការផ្ទេរមួយដែលមានតម្លៃខ្លួន៧២,៩លានផោន (ស្មើនឹង១០០លានដុល្លារអាមេរិក)។
នេះបើហោងទៅតាមប្រភពព័ត៌មាននានា កាលពីថ្ងៃពុធ។ Man United ពិតជាស្រេកឃ្លានក្នុងការនាំយក Sancho ទៅកាន់កីឡដ្ឋាន Old Trafford បើគិតចាប់តាំងពីឆ្នាំមុន ហើយទីបំផុត ពួកគេទទួលបានកីឡាករដែលស្ថិតក្នុគោលដៅរបស់ពួកគេ។ ក្រោយពីមិនបានបំពេញតាមតម្លៃខ្លួនដែលស្នើសុំចំនួន១០០លានផោន ពីក្លិប Dortmund កាលពីឆ្នាំមុន ក្លិបស្ថិតក្នុងក្របខ័ណ្ឌ Premier League មួយនេះ បានស្ថិតក្នុងការចរចានានា បើគិតចាប់តាំងពីបញ្ចប់រដូវកាលមកម្ល៉េះ ដើម្បីព្យាយាមធ្វើឲ្យការផ្ទេរកើតឡើង។
សំណើទី១របស់ Man United ក្នុងតម្លៃខ្លួន៦៧លានផោន ត្រូវបានច្រានចោល ប៉ុន្តែ ពួកគេបានបង្កើនការដេញថ្លៃ ដែលគ្រប់គ្រាន់ក្នុងការធ្វើឲ្យ Dortmund យល់ព្រមលក់ បើទោះបីតិចជាងតម្លៃខ្លួនដែលពួកគេចង់បានកាលពី១២ខែមុន ដោយសារតែការធ្លាក់សេដ្ឋកិច្ចដោយសារតែវីរុសកូវីដ ១៩ក ក៏ដោយ។ Sancho ត្រូវបានគេជឿជាក់ថា ទទួលបានភ្លើងខៀវរួចរាល់ហើយក្នុងការពិភាក្សាលើលក្ខខណ្ឌផ្ទាល់ខ្លួន ជាមួយនឹង Man United។ រូបគេនឹងត្រូវចុះហត្ថលេខារយៈពេល៥ឆ្នាំ នៅពេលដែលរូបគេទទួលការត្រួតពិនិត្យសុខភាពរួចរាល់៕
ប្រភពព័ត៌មាន៖ Channel News Asia