បរទេស៖ លោក Ole Gunnar Solskjaer គ្រូបង្វឹកក្រុមបិសាចក្រហម Manchester United មានបំណងចង់នាំយកកីឡាករថ្មី ៣ នាក់បន្ថែមទៀតមកកាន់កីឡាដ្ឋាន Old Trafford ក្នុងកំឡុងពេលទីផ្សារដោះដូរកីឡាករនិងបើកដំណើរការនារដូវក្តៅនេះ។
ក្លឹបជើងឯកអង់គ្លេស២០សម័យកំពុងស្ថិតយ៉ាងប្រកៀក ក្នុងការផ្ទេរយក Jadon Sancho ពីក្លឹប Borussia Dortmund ដោយដំណាក់កាលចុងក្រោយបន្ទាប់ពីកិច្ចព្រមព្រៀងគឺរង់ចាំតែការពិនិត្យសុខភាពចុងក្រោយតែប៉ុណ្ណោះ។
គេហទំព័រ The Guardian បានអោយដឹងថាគ្រូបង្វឹកសញ្ជាតិន័រវេលោក Solskjaer បានបន្តកំណត់គោលដៅចង់នាំយកកីឡាករដែលលេងក្នុងតួនាទីជាខ្សែម្រើ-ការពារ ខ្សែការពារកណ្តាល ព្រមទាំងខ្សែប្រយុទ្ធជួរមុខម្នាក់បន្ថែមទៀត បន្ទាប់ពីបញ្ចប់រដូវកាលចាស់មិនមានឈ្នះពានណាមួយសោះនោះ។
កីឡាករ Declan Rice របស់ក្រុមញញួរធំ West Ham United, Pau Torres របស់ Villarreal និង Harry Kane របស់ Tottenham Hotspur គឺជាកីឡាករបន្ទាប់ដែលនិងត្រូវចាប់ផ្តើមបង្កើនការចរចារខណៈដែល Kieran Trippier របស់ Atletico Madrid ក៏នៅជាទីចាប់អារម្មណ៏សម្រាប់អតីតខ្សែការពារស្តាំរបស់ក្រុម Tottenham រូបនេះផងដែរ៕
ប្រភពព័ត៍មាន៖ Sportsmole
